“Ko te tohu nui ko te whakaiti,” koirā tā Aroha Broughton-Pue, tētahi o ngā Toa Whakaihuwaka mō te Manukura Wahine o Te Matatini o Te Kāhui Maunga.
Tokorua ngā Manukura Wahine ka toa whakaihuwaka i te Korowai me te taonga whakamānawa i a Atareta Maxwell; ko Renee Mitai o Ōpōtiki mai Tawhiti rāua ko Aroha Broughton-Pue o Ngā Purapura o Te Tai Hauāuru.
“Me kaua tātou e wareware ki ngā takiruatanga o te ao, ki te ao atua, ki te ao tangata, ēngari ko te tohu nui ko te whakaiti, ko te whakaiti, ko te whakaiti,” hei tā Aroha Broughton-Pue.
“Kāore āno ki a tangata whenua tēnei ki a au, ēngari e koange te ngakau kua whakawhiwhia tēnei taonga nui kaua ki au, ēngari ki toku maunga, ki ōku iwi, ki ōku hapū, otirā, ki ngā mea kua whangai mai i a kupu rāua ko kōrero ki roto tonu i au.”
“Nā tāku kuia ahau i whakawāhine, ko ia tāku pā kaha, ko ia tonu tāku tai tūara i te wā i a ia, nana tonu te kōrero ki te tū koe, me māro te tū, ko te kupu a tāku kuia ki au, ki te tū koe me Tūmatauenga te tū, me Tū Te Nganahau te tū, ki te piu te piupiu me rere te piu e tia nei ko Tangaroa.”
I te wiki tonu nei, ka haria e Aroha e tōna pāpā hoki, e Rauru Broughton, te korowai ki te urupā o tōna kuia a Mereiwa Broughton ki Pākaraka i Taranaki ki te tonga.
“I tino koa rawa atu, tino kino rawa atu me te koa i te ngakau, kare au i te tino whakapono i te wā i rongo atu au, i te mea i taua wā i ahua maremare ana au i taua wā tonu, ēngari ka rongo au ‘oh kei te tika tāku rongo’ ana i pērā te ahua,” hei tā Rauru Broughton.
“Kia pēnei mai, Te Matatini, ā tonu ko Te Mauri o Te Matatini e akiaki nei, kaua i a ia ānake ēngari te motu katoa, kapa haka katoa, kei reira tētahi momo ka tū mauri ki tāku titiro e whakaoho ana i te katoa, nō reira ana kei roto i te wairua tonu o Te Matatini tonu ki tōku titiro,” hei tāna anō.
Hei te tau hou ka kawea e Ngā Purapura o Te Tai Hauāuru, te korowai Toa Whakaihuwaka nei ki Ōpōtiki ki te whakamānawa i a Renee Mitai.
