I kaha uiuitia te Pirimia, a Christopher Luxon e te taha āpitihana o te whare pāremata i te rā nei, whai muri mai i te whakatau i tuhi reta a David Seymour ki te ope Pirihimana hei tautoko i a Philip Polkinghorne, te tangata i whakapaetia ki te kōhuru a tana hoa rangatira.
Ko tā te Pirimia ki te ao pāpāho mō te reta, he “heahea” kē te tukuna o taua reta.
Heoi, ko te whakahoki a Seymour ki taua kōrero, ko te Pirimia kē te tangata e heahea ana, i te korenga ōna i mōhio ki te take i tuhia ai te reta.
Inapō, hui tahi ai te Pirimia ki a David Seymour, ki te āta wherawhera i te take, ā, hei tā te tokorua rā, i whai hua ngā whakawhiti kōrero.
Kua taumaha kē ake ngā take e karawhiua ana ki te aroaro o te Pirimia.
Kei te heke te puna tautoko ki te Kāwanatanga
E ai ki ngā tatauranga pōti, kei te kaha te whakawhirinaki mai a ngā kaipōti ki te taha mauī.
Inā te kī a te kaiārahi o te Rōpū Reipa, he kāwanatanga tēnei e pakanga ana ki waenga i a rātou anō, ka mutu, he āhuatanga kāhore anō kia kitea mō te wā roa.
Ahakoa koia te kaiārahi o te rōpū Act, tētahi o te tokotoru i tū ai hei kāwanatanga, kāhore te Pirimia e hiahia ana ki te whakahoki kōrero mō ngā porohianga a te kaiārahi o ACT.
E ai ki te kaiārahi o te Rōpū Reipa, ki a Chris Hipkins, ko te kāwanatanga tonu kei te patu i a rātou anō.
E ai ki ngā kaipōti, he kāwanatanga e nuku ana kia ahu whakararo o te toru tekau ōrau.
Kāore e kore he mahi nui kei mua i te aroaro o te Rōpū Reipa ki te eke anō rātou ki ngā tūru o te Kāwanatanga.
“No reira kāore mātou i te ohorere he maha ngā āwangawanga mō te rōpū Nāhinara i tēnei wā, kei te mōhio mātou ko wai te rangatira, ko David,” te kī a Willie Jackson.
