Kua hoki atu te taonga o te mate, te māreikura o te Kōhanga Reo ki tōna ūkaipō, ki Rāhui marae, ki Tikitiki i te rā nei.
Nō te Mane, i Te Poho o Rāwiri marae a Iritana e tīraha ana mō tōna toru rā i mua i tana whakahokitanga atu ki te wā kāinga.
Ko Rāwiri Waititi, ko Rahui Papa, ko Rāniera Proctor, rātau ko Tā Herewini Parata ētahi o te tira kawe i a ia ki tōna kāinga ake, ā ko ngā kōrero i runga i te marae, i whakaharurutia te papa o Rāhui marae.
Ko te kaiārahi o te Pāti Māori, ko Rāwiri Waititi tērā, i whakakata ake i te tangata, mā ōna tini kōrero mō Iritana e hoki ai ngā mahara ki te wā o te ora.
Hai tāna i waimarie katoa te Kōhanga Reo o mua, i te kaha o ngā kuia, koroua e puta ana tētahi reo kāre i rangona i ēnei wā.
“Ka hoki atu ngā mahara ki ērā taima. Āhua rerekē te Kōhanga Reo i tērā taima, kāre he kaiako kotahi, ko ngā pākeke katoa ka tae ki te Kōhanga Reo, ki te tamutamu i te kūmara, e kōrerohia nei e Pōpō, ki ngā mokopuna. Koia hoki te pai o te Kōhanga Reo i tērā taima. Ā, ka tae mai ngā tiwhikete kia whai ngā kerewa ka āhua raruraru ngā mea o te kāinga. Ka kite i te wehewehe a ngā pākeke, me te noho tahi. Kāre rātou mō te kōrero ki ngā tamariki, kei te kōrero rātou ki a rātou, engari ko ngā tamariki kei te whakarongo ki ngā kōrero, ki te mita o te reo, ērā tūāhuatanga katoa.”
Ko Rahui Papa anō tētahi i whakahoki i ōna whakaaro ki te kuia e tīraha nei, ki Tikitiki, ki ngā wā o te whakarongo ki tētahi kuia e kore e mate wheke noa.
Hai tāna ko tā te kahurangi mahi, ko te whakaū atu i ngā mātāpono tika, pono ki tāna e whakapono nei.
Ā ko Papa hoki tētahi e ngaua ana e ngā niho o te aroha e Iritana.
“Ka kīa mai au, Rahui he aha te take kei te pūhutihuti tō pāhau, anō nei he 70 tō pakeke, engari anō he pēpē noa iho koe. Ka kīa atu, e Iri, ki te heru au i taku pāhau, kua tono I.D mai mō ngā... Kua 15 mineti a ia e hamahama ana i a au, kaua e haere i ērā whare, he kino kei roto.”
Ko ngā tini tāngata i tau atu ki te papa o Rāhui marae i tēnei rangi, ā ka whakanuia tahitia te oranga o te poutokomanawa, o te whare o te Kōhanga Reo.
Nō te Rātapu a Iritana i riro ki te pō, ā ka nehua ki te rua kōiwi o ōna mātua tīpuna āpōpō.
