Ki te whai wāhi te whānau ki ngā mahi ako a te tamaiti, ka puāwai te ao o te mokopuna - koirā ngā kitenga a tētahi pūrongo hou.
Hei tā te rangahau nei, ki te whai māramatanga te whānau e pā ana ki te marautanga o Te Whāriki a Te Kōhanga Reo, ka kaha ake tā rātau takoha atu ki te whanaketanga o a rātau tamariki.
Ko tā te pūrongo Mātai Mokopuna nā Tākuta Hoana McMillan (Ngāi te Rangi, Ngāti Porou, Ngāti Kahungunu) nō Te Whare Wānanga o Waikato, he whakapuaki i tētahi tirohanga motuhake mō te hiranga o te mahi tahi a te whānau ki te kaiako i roto i tētahi kōhanga reo.
Hei tā McMillan, “Mai rā anō ko tā te kōhanga reo tikanga, me mōhio ngā whānau he haepapa nui a rātau arā, me whai wā rātau ki te tautoko i te ako me te whanaketanga o a rātau tamariki. He rerekē tēnei i ētahi atu horopaki e whakapae ana ‘he kuare noa iho’ ngā whānau, ‘horekau he tohu’ rānei.”
Ko te mana, ko te wehi, ko te whakapapa me te whāngai i ngā mātauranga tuku iho ki te tamaiti ngā uaratanga matua o Te Whāriki a Te Kōhanga Reo.
I whai wāhi atu ngā whānau, ngā kaiako, ngā kaiāwhina me ngā mokopuna o Te Kōhanga Reo ki Rotokawa ki tēnei rangahau. Ka mutu, i mahi tahi rātau ki te whakawhānui i tō rātau māramatanga ki Te Whāriki a Te Kōhanga Reo, otirā te taiao me ngā āhuatanga katoa o te mokopuna.
Ko ngā kitenga i roto i ngā tātaritanga o ēnei wānanga, kia whanake ngā mōhiotanga o te whānau mō tēnei marautanga ki tō te kaiako me te mokopuna taha, ka hōhonu ake o rātau tirohanga ki te mana o te mokopuna, kia rite tonu ki tō te kaiako.
E ai ki a McMillan, ka whakanui tēnei rangahau i ngā mahi a te Kōhanga Reo.
“Ka whakaatu hoki i ngā hua o te mahi tahi o te katoa kia toitū te mana o te mokopuna, kia whakamanahia hoki te mātauranga o ngā whānau ka kawea mai e rātau, anō nei he mātanga.”
“He tirohanga Māori tēnei e hāngai ana ki ngā āhuatanga katoa o te tamaiti. Ko te manako nui ka whakataunaki tēnei pūrongo i ngā kaupapa matua a te kōhanga reo.”
