Hei tā Te Rōpū Whakamana i te Tiriti o Waitangi, inā te nui o ngā takahitanga a te Karauna ki ngā mātāpono o te Tiriti i tana arotake i te pūnaha mātauranga i raro i te kaupapa Tomorrow’s Schools.
Nō te rā nei puta ai te rīpoata Kei Ahotea Te Aho Matua nā Te Rōpū Whakamana, e 400 whārangi te rahi. Ko ngā kitenga o roto e mea ana kāore Te Rūnanga Nui o Ngā Kura Kaupapa Māori Aho Matua i whai wāhi ki ngā kōrerorero, otirā ki ngā mahi whakarite kaupapa here, e tiakina ai te mana motuhake o ngā Kura Kaupapa Māori Aho Matua. Ka mutu, kāore hoki te Karauna i kaha ki te whakamōhio atu i te Te Rūnanga Nui ki te ahunga o ngā kaupapa here mātauranga i whiriwhiria.
Hei tā Dr Cathy Dewes, hea takirua o Te Rūnanga Nui, e tata tonu ana te mōhiotia whānuitia o ngā hara kua rangona e ngā Kura Kaupapa Māori i roto i ngā tau e 35 kua hori.
Hei tāna tonu, kua roa ngā Kura Kaupapa Māori o te motu e whai nei i ngā ture whakahaere i te pūnaha aunoa, Pākehā hoki, ā, ko ngā mātāpono o Te Aho Matua, o te Māori kua noho mātāmuri i ngā kawenga.
I te tau 2018 i whakaritea e te kāwanatanga o taua wā, he arotake mō te kaupapa Tomorrow’s Schools me te hiahia kia whakahōungia taua kaupapa i tīmata ai i te tau 1989.
Ka hipa ngā tau e whā, ā, i te tau 2022 i kōkiritia e Dewes tētahi kokoraho kōhukihuki ki Te Rōpū Whakamana. Ko Te Rūnanga Nui te rōpū kōkiri matua, heoi ko ngā raukura hoki ētahi o ngā kaituku kōrero, ā, i whai wāhi hoki, ko ngā rōpū pēnei ko Te Kōhanga Reo, ko ngā Kura ā-iwi hoki.
Hei tā te rīpoata, kāore te Karauna i whai i ngā mātāpono o te mahi tahi, o te whakahaumaru, o te taurite rānei, i āna mahi whakahōu i te pūnaha mātauranga.
Ko ētahi o ngā tūtohutanga a te Rōpū Whakamana, ko te whakahau ki te Karauna kia noho tahi ki ngā rōpū pēnei ki Te Rūnanga Nui ki te hanga marautanga, kaupapa here hoki mā ngā kura o Te Aho Matua. Koia te pae tata.
Ā, ko te tūtohunga pae tawhiti, me manawa rahi te kāwanatanga ki te whakatū Manatū Mātauranga Kaupapa Māori hei whakahaere i te pūnaha mātauranga ka whai pānga ki te iwi Māori.