Kua roa a Mikaere Sydney e kōingo ana ki te whai i te tūru Māori o Te Awanui ki roto i ngā kōwhiringa pōti kaunihera ki Tauranga, e haere ake nei.
I Te Wharekura o Mauao a Sydney e pānui whānui ana i tōna hiahia kia whai tūru ia ki te kaunihera hei kanohi Māori, hei reo Māori anō hoki.
“I te wā i kōrero au ki ōku kaumātua, a koro Bobby, koro Hauata, i kī rāua he aha ai kaore au i tū te ringa i te tuatahi,” e ai ki a Sydney.
“Mō te anamata o Tauranga Moana kia mahi ngātahi ai te tāngata tiriti, tāngata whenua otirā he kaunihera, kia mahi ngātahi te kaunihera ki ngā tāngata nō kōnei,” hei tāna anō.
“Ko taku whainga kia noho ana ki tēnei o ngā tūranga mo te wā roa”.
Puta ana te karere nei i te wiki tonu i pānui ai te hiahia a te manu tīoriori o Tauranga Moana a Ria Hall, kua rēhita ia ki te pakanga mō te tūranga o te Koromatua o Tauranga.
“Kua roa nei mātou ngā tāngata whenua, ngā iwi nō kōnei e noho ahua hōhā, tino hōhā ki ngā whakataunga o ngā kaunihera. Nō reira kua eke te wā kia tū te ringa,” hei tā Ria Hall.
“Ae te mata Māori tēnei, ēngari he nui ngā whakaaro, he nui hoki ngā wawata, ngā hiahia kia whai hua,” hei tā Hall anō.
Nā Toni Ririnui tētahi rautaki tōrangapū Māori i whakakotahi ai ki te tautoko i ngā manako nui o ngā iwi o Tauranga.
“Ko tāku e hiahia ai kia uru mai ngā reo Māori, ngā mangai Māori i te mea ko tō rātau he tirohanga whānui,” hei tā Ririnui.
“Kia kite tātau i ngā tāngata pērā kia Ria Hall, kia Hautapu Baker ki tētahi i noho mai ki tēnei turu Te Awanui me kī ko Mikaere tētahi kia kite ērā kanohi hei painga mo te moana,” hei tāna.
Ko te Rā Horoi, te 20 o Hurae, te rā ka whakatau ko wai ka hua ki ngā tini tūranga mō te kaunihera o Tauranga.
