Kei Pariroa Pā, whakateraki i Pātea, e whakapūmautia ana te mauri o Te Matatini, i tā Aotea waka kawe i a ia ki runga i a Ngāti Ruanui i mua i te tīmatanga o te whakataetae kapa haka ā-rohe o Te Kāhui Maunga ka tū āpōpō.
He tini makiu i pōhiritia atu, me te mauri kōhatu i kawea ki te rohe whai muri i Te Matatini Herenga Waka, Herenga Tangata i tū ki Tāmaki Makaurau i te tau pākehā ki muri nei.
I tōna wā, ko Aotea kē te ingoa o te rohe kapa haka nei, engari kua hurihia ki te ingoa hou, arā ko Te Kāhui Maunga. E ai ki te heamana o Te Kāhui Maunga, ki a Tama Pokai, he huringa tika hai karangatanga mō tēnei rohe.
“Ko ngā ingoa o ngā rohe i whakatau[ria] e Te Matatini, nō ngā tauārai o te kōti whenua Māori. Nā reira, mā reira ka kite atu, ko te rohe nei o Aotea, erangi ko te ingoa o Te Kāhui Maunga e whakatō ana i ngā āhuatanga katoa o tēnei rohe. Mai i Parinīhini ki Waitōtara, ki te awa tupua, hoki uta rā ki Te Kāhui Maunga, ana ki Taumarunui, peka atu anō rā ki runga [i] a Ngāti Apa ki te Pā o ngā Ariki.
“Nō reira he rohe whānui atu tēnei me tō tātou rahi,” te kī a Pokai.
Hai āpōpō 13 ngā kapa ka tū ki te whakangahau, ki te whakataetae anō hoki, i te whare o Ruapūtahanga, arā i TSB Hub, i Te Hāwera. Hei tā Pokai anō, he koanga ngākau ki te kite i te tini mata kua tau atu ki runga ki tōna papa, hai tīmata i ngā mahi a Tānerore, a Hinerēhia.
“Kua tau te wairua i tēnei wā i te mea, kua tae te wā. Ka rongo au i te wairua hihiko i roto i te tangata me tēnei kaupapa whakahirahira.”
Ka hika ake ai ngā mahi haka hei te 8:30 i te ata āpōpō, ā, ka arorangi te whakapāhotia mā Māori+.
