Ko ngā mahi me ngā kaupapa here a te kāwanatanga e hāngai ana ki te Māori kei te rutua hoki i runga i te papa tākaro whutupōro Super Rugby.
Ko te haka a te kapa Hurricanes Poua ka hakaina i mua i ā rātou tukinga, kua whai wāhanga hōu e whakatakoto mānuka atu ana ki te kāwanatanga.
He taki hou i whakaputaina e te kapa Poua i te mutunga wiki kua pāhure nei, ā, hai tā te kaitito i tēnei wāhanga o te haka, tā Hinewai Pomare nō Te Taitokerau, i ahu mai tēnei wāhanga hou i te whakaaro o ngā kaitākaro.
“Nā ngā wāhine tonu o te rōpū Poua i ringi mai te tono kia whakaritea ētahi kupu e whakaatu atu ana i tō rātou rikarika, i tō rātou riri, tō rātou hōhā ki ngā āhuaranga o te wā.”
Toitū te Mana Māori Motuhake.
Ko ngā kupu taki o te haka e mea ana Toitū Te Tiriti, Toitū He Whakaputanga, Toitū te Mana Māori Motuhake, ā, koia ko te ito o te taki hou.
Ahakoa kāre te katoa o ngā kaitākaro i te Māori, ko ngā whakaaro i kotahi ai i runga i te tū a ngā iwi katoa i tēnei whenua ki ngā kaupapa pēnei i te hui ā-motu a te Kīngitanga, te hui ki Rātana Pā, me te hui nunui rawa i Waitangi i tēnei tau.
Hai tā Pomare ahakoa te ahurea o ngā kaitākaro, kotahi noa iho te whakaaro ki tēnei kāwanatanga.
“Ko te pai o te hākinakina hei tāku, ko te mahi tahi a ngā iwi katoa i roto i te tīma ki te whakatutuki i te whāinga nui. Nā, e pērā ana hoki i te taha haka, ko ngā kaitākaro nā rātou tonu tēnei whakaaro ki te whakarite i ētahi kupu wero ana i te kāwanatanga, whakaaweawe i te iwi Māori, whakaaweawe i ngā tāngata katoa e noho ana ki tēnei whenua.
“I runga hoki i te mōhio i whai pakiaka ai te nuinga o ngā manuhiri ki tēnei whenua, nā Te Tiriti tonu.”
Me whakamahi te whīra hai ātea ka tika.
Kāre ngā kapa i te whakataetae Aupiki i te i te kapa tino whai rawa engari, ahakoa tā rātou noho mātāmuri ki ngā kapa tāne, ko te wāhi ki a rātau, ko te whakapau kaha tonu.
He tuatahitanga tēnei momo wero a tētahi kapa i te atamira o te ao whutupōro, ā, e ai ki a Pomare koinei te wāhi pai hai whakatakoto whakaaro ki ngā āhuatanga kāre i pai ki a rātau.
“I ōna wā rā, ko te ātea o te marae koia tērā ko te wāhi i puta ai ēnei kōrero, nā ko te pakanga tonu rā. Ko te ātea o nāianei, ko ēnei, ko te kāmera, ko te paeāhua, ko te pukamata, ko te koromatua. Nā, ko te whīra pakanga, ko te whīra whutupōro i āianei.
“E mihi ana ahau ki ēnei wahine i runga i tō rātou maia, i runga i te wehi kore te tuku i ēnei kōrero. E whakakōrero ana i ngā whakaaro e puta ana i te motu. Ehara i te mea ko rātou anahe e pērā ana, ko tātou tonu e rongo ana i tērā riri.”