Ko Te Manatū Ahu Matua e whakahau tonu ana i te iwi tūmatanui kia kaua e kohi, e kai rānei i ngā mātaitai kua kohia i Te Taitokerau ki te uru, nā te nui o te tūpono pāngia e te tāoke pararūtiki.
Ko Vincent Arbuckle te kaiwhakahaere takirua o New Zealand Food Safety, i raro i Te Manatū Ahu Matua, nāna te pānui whakatūpato i whakaputa.
Hei tā Arbuckle, “ko ngā whakamātautau i mahia i te whanga o Hokianga e whakaatu ana i te nui o te rauropi hanga tāoke, ko te phytoplankton.”
“Nā tēnei, ka nui te tūpono pokea ngā mātaitai e te tāoke pararūtiki ki tua o te nui e haumaru ai.”
“He whakatūpato e tau ana ki te rohe, atu i Te Rae o Tauroa tatū atu ki Glinks Gully, kapi katoa ana ngā whānga o Herekino, o Whangapē, o Hokianga,” hei tāna.
E īnoihia ana kia kaua e kai i ngā mātaitai i aua rohe, kei pākia e te māuiui.
“Ko ngā mātaitai kua pākia, ko te kūtai, te tio, te tuatua, te pipi, te toheroa, te tūangi, te tipa, te karahū, te kina hoki. He mea nui hoki kia mōhiotia ai, ki te tunu i te mātaitai, ka kore te paitini e unuhia.”
Kua memeha ngā whakatūpato i puta i te Noema mō te rohe o Te Tairāwhiti o Te Ika a Māui, i te hekenga o te tāoke ki ngā taumata e haumaru ai i ētahi waahi.
E tau tonu ngā whakatūpato mō ngā mātaitai atu i Te Awanga ki Bay View, atu i te awa o Wairoa heke iho ki Whangaparāoa anō hoki.
Kei te aroturuki i ngā mātaitai o te rohe, ā ka whakamōhio atu ki te marea ina huri ai te āhua.
Ko ngā tohu o te pānga ki te paihana, ka uaua te horomi, ko te ānini o te māhunga, ko te ruaki, te kōrere, te pararūtiki, te ngoikore o te manawa, ā, ki te kino rawa atu, he mate te otinga.
Mēnā ka māuiui i muri i te kai mātaitai, me whakapā atu ki Healthline i te 0800 61 11 16, puritia hoki ngā toenga mātaitai kia whakamātauria.