He raukura nō Taranaki kua eke ki te rekoata o te ao mō te panatoro a te wahine. He mea tutuki nā Ashleigh Hoeta o Te Ātiawa, e toru tau whai muri i tōna pānga ki te roro ikura. E rua tekau mā whitu tau tōna pakeke.
Kotahi wiki i mua i te kapinga o te motu nā te Mate Korona i te tau 2020, i ngana ia ki te whakapakari i ōna matimati, me ōna waewae whai muri i tōna pānga ki te roro ikura.
Hei tāna, “ia rā, ia rā i hīkoi au i te whare, kia ngana ki te whakakori i tōku tinana, ki te mahi panatū, te nohotū, ā, whai muri i ngā wiki e rima rima, i kaha ake te taha o tōku tinana i pāngia e te roro ikura, tērā i tōku taha ora.
He wā tērā i tino whakamana i a au. Nā tērā i tau ai ōku whakaaro, ka taea e au ngā mea katoa ka mau ki tōku hinengaro.”
Inā tōna pakari, ka hipa ngā marama 13, ko Hoeta tērā i eke ki te taumata o te wahine hikikaha toa o Aotearoa.
Te hiki i te kotahi rau rima tekau pereki te rite.
I te tau 2021, i toa i a ia te whakataetae wāhine mamau ringa o Aotearoa.
Tatū mai ki ēnei rā, ko te kainoho nei o Kirikiriroa te wahine tuatahi i te ao ki te panatoro i te 300 kirokaramu.
Nāna te 317.5 kirokaramu i panatoro, he rite ki te 150 pereki te taumaha.
Ehara ko te roro ikura anahe i whakataumaha i a ia, ko tōna pāpa hoki, ko Ashley Hoeta tōna ingoa, i mate i te mate pāwhiti i te Ōketopa.
Engari, hei tā tēnei māmā o ngā tamariki e rua, i rongo tonu ia i te nui o te tautoko a tōna pāpā i ōna mahara, i te rā i whatia e ia te rekoata.
“Koia pū te pūtake o taku ekenga.”
“E mōhio au, ki te kore ia i māuiui, i haukiore, ko ia tonu tērā i tōku taha e mahi mai ana.”
“Koirā hoki i ārahi i ahau i taua wā, me te mōhio, ka ora ia ki te kite i ngā mahi,” te kī a Hoeta.”
I roto i ngā marama 12, i whakatā ia i ngā mahi whakataetae, i ngā whakangungu hoki hei tiaki i tōna pāpā.
Ko te whawhati rekoata kaare i memeha ake i tōna ao i tērā wā, ko te whakamutu ake i āna mahi hākinakina katoa te whakaaro.
Engari, i mua i te matenga o tōna pāpā, i tau i a ia ngā kī taurangi e toru.
Ko te whakangungu mō ngā whakataetae hikimaitai e rua i te marama o Hepetema, kia toa te whakataetae wāhine mamau ringa o Aotearoa, ā, kia mau hoki i a ia te rekoata o te ao mō te panatoro a te wahine.
I a ia e tutuki ana i ngā kī taurangi ki tōna pāpā, i tono ia ki tōna whānau kia taituarā i a ia i te rā o te panatoro.
“I reira tōku whānau. I āio te hinengaro tae atu ki te wā i eke te panatoro, ā, i te otinga mai, i puta katoa i a au ngā kare ā roto o te marama i pahure. I mīharo, i te mea i puta katoa mai tōku whanau ki a au.”
Na ōna kī taurangi i hihiri ake ai i a ia kia haere tonu i tana haere, i nui hoki te aro o te tini ki a ia whai muri i tana toahanga.
Kei te tuku mihi hoki ia ki tōna kaiako, kaitohu o Kiwi Strength i Kirikiriroa, ki a Daniel Rudolph.
E whakapono ana ia, ko tōna kaiako tōna pou whakakaha i a ia i ngā tau e whā.
“Ia te wā, ka whakamahara ia i a au kia haere tonu. Ko tāna ‘mahia te mahi, ka taea e koe’, ka whakapono ia ka taea e te tangata ahakoa kāre te tangata e whakapono ana ki a ia anō. I te wā ka tutuki, kātahi ka mōhio, ā, he tika hoki tāna.”
Ka oke ururoa tonu atu a Hoeta i ngā whakataetae panatoro e haere ake nei, i tana whai i ngā tono ki a ia ki whai i ngā whakataetae mamau ringa, hiki maitai, panatoro hoki i tāwāhi.