Kāre te kawanatanga e tino mōhio ana i te nui o ngā hoia ki Ukraine nō Aotearoa, ā, e mau ana a Hemana Waaka i te pōtae whakahōnore hai whakamaumahara i te hinganga o tētahi hoia ki Ukraine. E kōrerotia ana e ia mō ngā āhuatanga o tēnei mate, ka mutu te whawhai ki reira.
“Ahakoa i ohorere tāna haere ki reira, i roto i ā mātou nā tikanga a tāua te Māori, he hoia te hoia, ahakoa tana hingatanga i haere i te pūmanawa o tana aroha ki te iwi, i parekura ai i reira. Nāreira he hōnore nui tēnei ki aia me te whānau pani, e kī ana te kōrero ka maumahara tonu mātou ki a rātou.”
Hai te kawanatanga o te motu nei, kāre rātau e mōhio mēnā rānei e āhei ana rātau te whakahoki mai te tūpāpaku o Kapara Dominic Abelen, heoi anō hai tā Waaka, kāre mā te whānau anahe te tūpāpaku e whakahoki mai ki tōna kāinga.
“Me kuhu atu ngā ringaringa o te kāwanatanga ki te tautoko i te whānau pani, kia āta hoki mai tēnei uri ahakoa i haere i raro i te ohorere. Ko te mea nui kē, hei whakatau i te wairua, me te arohanui o te whānau. Ko te tūmanako ka kitea, ka kaha tēnei kawana te whakahoki mai i tēnei hoia kua mate ai i reira.”
He ika ā whiro a Waaka nō Ngāti Tūmatauenga, ā, i ōna nā rā i roto i ngā whawhai ki Malaya ki Borneo anō hoki he hiahia nō rātau ko ōna hoa ki te haere mō ō rātau aroha ki tō rātau whenua taurikura.
“Nō mātou tonu te hiahia ki te haere, kāre mātou e tohutohu ia kia haere, ko mātou tonu i whakaaro nui, i raro i te mana o te Kīngi o ō tātou moutere, me te Atua. Nāreira kei roto i a mātou tērā tūmanako, tērā wawata. Kāre mātou i whakaaro tērā pea ka hoki mai mātou, kei te mate mātou, ka māuiui rānei. Kotahi noa iho te whakaaro i te hinengaro, haere, haere ngātahi, haere atu, mahia te mahi, ka hoki mai.”
Hai tāna anō he pai ake te kōrero ngātahi te hoia ki tōna whānau me ōna rangatira i mua i tana wehenga ki te pakanga, kia kore ai tēnei mahi i puta mai anō.
“Tuatahi, nā te ohorere o te haere o te tangata nei, e pai ake mēnā i haere ki te kōrero atu ki ōna āpiha, kei te rongo, kei te hiahia aia te mutu mai i te hoia, mō te toru marama, mō te ono marama kaua e utua. Kia makere katoa mai ngā here o te hoia ki aia. Engari, ko te raruraru o tērā, ko te whakawhiti atu aia i reira ko wai ka mōhio ka hoki mai ka aha rānei. Ko tērā raruraru tērā.”
Heoi anō kai te tuku tonu aia tōna aroha ki te toa kua ngū, me tōna whānau e noho ana i raro i te kapua pōuri.
“Kāre te kawana i te mōhio i haere aia, kāre āna mātua i te mōhio i haere aia, nā te hihiko tonu o tana ngākau, nā tōna aroha ki tērā iwi ka haere aia i runga i te pōhēhē ka hoki mai aia. Engari kāre i tutuki pērā Peata. Nāreira ka nui te aroha ki te hoia nei, he hoia kotahi, ā, ka pā katoa mai ki ngā hoia katoa kei kōnei kei Aotearoa, nā, pēnei i a mātou nei. Ka noho pūmau tonu mātou ki tō mātou oati, tiakihia tētahi, manaakihia tētahi.”
