He taonga nō tuauki tēnei te hora whānui ake nei.
Kua hia nei te roa o ngā kairākau nei e whakahaere ana i ngā akoranga Mau Rākau, nā te aroha nui ki te kaupapa. Ināianei he pūtea kua whakatahahia e Ihi Aotearoa e āhei ai Te Whare Tū Tauā o Aotearoa ki te kawe i ngā akoranga ki ngā kura o te motu.
He kirikawa a Hemi Tai Tin ki Te Whare Tū Tauā o Aotearoa. Hei tāna ki a au, "mohio kē tāua, ko te whakataukī e kīa nei, tamariki wāwāhi tahā, aratakina ki te mātāpuna o te ora, mātāpuna o mōhio, mātāpuna o te maungarongo.
“Mehemea he taonga nui ki au ko te mōhio ko wai koe, nō hea koe, koia e mea ana, ko te taiaha tonu te tangata.”
Hei tā Tai Tin tonu, nā ngā whanaunga Māori i ngā umanga pēnei i Ihi NZ, i mana ai tēnei piringa.
“Tātou nei nā he iwi rautaki, nā konā, nā te whai pānga ki ngā whanaunga ki roto i te umanga nei, i wāhia mai e rātou tētahi huarahi ki a mātou, he mea nui tēnei.
“Kua pēnei a Te Ihi, kua aro mai, me te mihi ki tōna hūmārie me te mihi hoki ki tōna hiahia tūturu, te tautoko i tēnei kaupapa.”
Ko te pūtea te whiwhinga nui i tēnei hononga hou, engari hei tā Tai Tin me mātāmua tonu te kaupapa, kaua ko te pūtea.
“E kore mātou e whakaae kia Atua nui a moni ki a mātou. Ko te Atua nui ki a mātou ko Tū rāua ko Rongo.”
He kaiako tahi a Wiremu Tai Tin (Ngāti Hine, Ngāti Hāmoa) me tāna makau a Chrissy Hiraani Hilton (Ngāti Kahungunu, Tauranga Moana, Te Arawa) i Te Whare Tū Tauā o Aotearoa, e whakapono mārika ana ki ngā oranga o roto i te mahi mau rākau mō te tinana, hinengaro, wairua anō hoki o te hunga rangatahi.
Hei tā Hilton, “Ko te whakaara i a koe anō mā ngā mahi o tuauki pēnei i te mau rākau, te tino wāhanga ki a au, ko te aru, ko te pupuri ki ngā mātauranga e wātea mai nei i te ao mau rākau hei hua mā mātou i te ao hurihuri nei.”
Ko tā Wiremu, “ko te whāinga matua ki a au, ko te whakatupu i te rangatiratanga o te tangata, ko te whakaatu atu ahakoa ngā piere nuku o te wā, he ora ka hīnātore mai, ka tū ko koe hei raukura i te otinga atu.”
Ko te whai tautoko mā ngā kaupapa Māori, te manako nui ka puta i tēnei tūhononga hōu, hei oranga mā te rangatahi.
