Ka tohu tēnei wiki i te huringa tau whā tekau o te Kōhanga Reo. Ahakoa he wā hei whakanui i te kaupapa, ko tā Te Kōhanga Reo, he taumaha, i te katinga o etahi o ngā Kōhanga me te pāhekeheke o te nama o ngā mokopuna - e noho tāwēwē ana tōna anamata.
Hei tā te Toihau o Te Kōhanga Reo, hei tā Rāniera Proctor, inā te huhua o ngā take e ngau tonu ana i te kaupapa
“Etahi o ngā uauatanga kua kitea e mātou i roto i te whakamanahia o te whānau i roto i te taha ki ngā pūtea. Ka mutu, ko te whakamanahia o te kaupapa i roto i te whakataurite ia mātou ki tētahi atu kaupapa”
I te ekenga o te Kōhanga Reo ki te whā tekau tau - Ko te pūtea taurite me ngā utu ētahi o ngā take kua roa e tohe ana
“Ko te whāinga nui kia rite te utu o ngā kaimahi i roto i ngā Kōhanga Reo ki ngā kaimahi i roto i o tātou kura Māori. Nō te mea e whakamanahia ana te reo i roto i ērā kura, e utua hoki ana rātou i te reo e whāngaihia ana”
I te tahua pūtea o te tau rua mano rua tekau neke atu i te 200 miriona tāra i tuku i roto i ngā tau e whā ki te Kōhanga Reo. Nā wai, kua whakatū he poari Māori hoki, ko tana mahi he whakaihiihi i te rāngai mātauranga Māori. Hei tā te Minita Take Tuarua Mātauranga Māori, hei tā Kelvin Davis, kua whakatakoto ia i te mānuka.
I whakamānuhia e te minita i Te Pae Roa, ā, he māharahara nui ōna ki te kore whakapiri atu o te rāngai mātauranga Māori ki te rautaki o te kāwanatanga e whakawhanake ai i te rāngai.
“He nui ngā kōrero, ki ēnei rōpū, ēhara ki te Kōhanga Reo anake, he nui, he tini ngā kōrero engari kīhai rātou i whakaae ki te hono ki tēnei kaupapa” tā te minita.
I te tau rua mano tekau mā toru he whā rau whitu tekau mā tahi ngā kōhanga reo, inaianei - whā rau rima tekau. Inā te pouri nui mo ngā kaiarahi o Te Kōhanga Reo
“Kei te kati haere. Ia tau ka heke te kaute o ngā mokopuna 50 ki te 100. Ko te whakatauki o te kohanga, pono ki te kaupapa, puna ko te reo. Engari ki te heke haere te pono ki te kaupapa mā wai hoki te puna e whāngai” te pātai a Proctor.
Ahakoa ngā tohe, ko tā Minita Davis, me haere tonu ngā mahi e angitu ake ai Te Kōhanga Reo
“Ko taku hiahia kia puawai, kia tupu ake ngā kōhanga reo, ngā taitamariki e haere ana ki ngā kōhanga reo. Nāku i mea atu ki a rātou kia whakatakoto he rautaki me anga pēhea tātou katoa”
Hei āpōpō whakanuia ai te whā tekau tau e Te Kōhanga ki tōnā orokotimatanga, ki Waiwhetu, Te Awakairangi.