He pakihi mahi pounamu wai nō Haina kei te kimi whakaaetanga i te Māori ki te whakarahi ake i tāna ngongo wai i te mātāwainuku i Otakiri Springs, pātata atu ki Whakatāne. Kua whakaae Te Kōti Taiao ki te tono kia whakarahingia ake, heoi kei te tū ngā pihi o te hau kāinga.
I raro i tōna ingoa rēhita Creswell NZ LTD, e ai ki ngā whakamārama, mā te whakawhānuitanga o āna mahi, ka taea te 3.7 miriona pounamu wai kirihōu te whakaputa, ia rā.
Nā konā kua ara ake te rōpū Save Our Wai, e whakahaerehia ana e Sustainable Otakiri. Kei te kohi pūtea rātou ki te tuku tono hei pīra i te whakatau a Te Kōti Taiao ki Te Kōti Teitei.
“In terms of what it means for everyday New Zealanders, we’re not getting a fair say,” te kōrero a te heamana o te rōpū, a Maureen O’Kane.
Ko te hiahia a Save Our Wai, he whakarerekē i te kaupapa o te ngongo wai, kia tau kē he korowai tiaki i te puna, ā kia whai wāhi atu ai te Māori me te hapori whānui ki te tēpū kōrero.
Almost at 10,000 signatures, if you haven't signed yet please take the time to do so. If you can help us fundraise...
Posted by Save Our Wai on Friday, January 3, 2020
I pīrahia e Te Rūnanga o Ngāti Awa te whakaaetanga i Te Kōti Taiao i te Haratua o tērā tau. Kaare rātou i te whakaae ki te whakarahinga ake o te ngongo wai, kei tūkinohia te mauri o te wai, kei kino hoki ngā pānga ki te taiao.
Nā ngā māngai o Creswell te kōrero ki Te Kōti Taiao, e 52 ngā tūranga mahi ukiuki ka hua ake i āna mahere. Ko tāna matapae hoki, e 237 ngā tūranga mahi ukiuki ka tūpono hua ake i te whakawhānuitanga o ngā mahi. Ko tā te rangatira o te kamupene, ko tā Shanshan Zhong ki a Ngāti Awa, ka whakawāteahia ngā tūranga mahi ki a rātou i te tuatahi.
“We support job employment but we want it to go hand in hand with ensuring that our environment doesn’t pay the cost,” te kōrero a O’Kane.
Ko Te Taurapa Tūhono (NZTE) te tari kāwanatanga nōna te mana whakawhanake ōhanga. Hei tā te ringatohu o NZTE, tā Tina Wilson, nā te mea i motuhake te hoko i a Otakiri, ka kore rātou e whai wāhi ki tēnei take.
Heoi, ka āwhina ia i ngā whakawhitinga kōrero kei tua me te hunga ka tūpono whakangao atu. “Our ultimate aim is for the good of Aotearoa.”
E mārama ana a Sustainable Otakiri ki ngā māharahara mō te whakamahi i ngā pounamu kirihōu, mō te oranga hoki o ngā wai. Kua whakahaua te hunga kāinga o Kawerau kia kōhuatia te wai inu i te kitenga atu o te E.Coli i roto i ngā whakamātauatau wai o te wā.
E whai nei a Save Our Wai ki te kohi i te $32,000 i tana whārangi Pledge Me hei kōkiri i tāna tono pīra ki Te Kōti Teitei. E rua wiki e toe ana, ka kapi te wā tono pīra.