He oati nā ngā mātua me ngā kaitiaki o Tai Wānanga ki Kirikiriroa, ka pakanga tonu rātou mō te orangatonutanga o tō rātou kura.
I tētahi pūrongo motuhake inapō, nā Te Ao i whakaputa ngā kōrero a Laurie Hakiwai, heamana tuarua o te Poari Kaitiaki o Tai Wānanga, i mea ake "he whakahē nā te tokoiti o ngā whānau whai pānga ki te kura."
Heoi, e ai ki a Jeanne Kerr, māngai o te rōpū whānau nei, he hui ake i te rima tekau kē te nui o ngā mātua, kaitiaki whāngai, kaimahi, ākonga o mua hoki nā rātou i waitohu te tohe tuatahi i whakatakotoria ki mua i Te Tāhuhu o te Mātauranga neke atu i ngā marama e whā ki muri nei. I taua wā, 120 ngā ākonga o te kura, he tata ki te 50% tērā o te hapori o te kura.
Hei tā Kerr anō, nā te take nei, kua kōhukihuki te noho a ngā ākonga me ngā kaimahi i tēnei wā.
Hei āpiti atu ki ngā kōrero hōu, i puta i Te Ao te whakahē a Jeanne Kerr ki te heamana o te poari, ki a Laurie Hakiwai mō te "tokoiti o ngā whānau". Ko tā Hakiwai kōrero i tēnei pō, "arohamai the board is unable to respond within the timeframe you have provided."