Kua toa te kapa Tāne Haupoi Māori o Waiariki i te whakataetae Haupoi Māori ā-motu i tū i Tūranganui a Kiwa. Koia nei te tau tuatoru karapīpiti kua eke panuku ai te kapa tāne nei ki tēnei o ngā taumata.
“I te tāhūhū o tō mātau whare arā ko te tākaro hei tīma, hei kapa, ko te kotahitanga, ko te brotherhood i roto i tēnei kapa, koira pea te kura huna i roto i tēnei tīma i wikitōria ai mātau.”
Kua roa nei a Tāmaki rāua ko Waiariki e pakanga ana, neke atu i te rua tekau tau nei te roa, heoi anō tā Moko Rangitauira, he whakataetae i roto tonu i te whanaungatanga.
“Kāre he tōnamana i tua atu kāre he tōnamana ki kō atu i kō mai i tēnei, nā runga i te wairua Māori e rērere haere ana i tēnei whakataetae, nā runga anō hoki i te kounga o te haupoi e tākorohia ana i tēnei whakataetae.”
Hei tā Moko Rangitauira, he momo āhuatanga tuku iho e poipoia ai te reanga hou i te maru o tēnei whakataetae.
“Nā mātau te māngari nui kua noho mātau ngā rangatahi nei i raro i ngā rekereke o Tenga Rangitauira, o Tūwharetoa, o Connor Herewini rātau katoa, kua noho hei tūākana mō mātau ngā taina kia pai tā mātau tākaro i tēnei whakataetae.”
I roto tonu i ngā tukitukinga puta ai ngā pūkenga mīharo, ka mutu e rua piro ki ia tīma i te mutunga iho.
“I pai tonu, nā runga anō i te mōhio i te pai te tākaro ā ngā tama, engari i tae ki tērā wāhanga o te kēmu, ka āhua matakū i runga i te pōhēhē nui kei riro i a rātau te wikitōriatanga o tēnei kēmu.”
Nā reira i tū ai ngā whainga tauutuutu, arā tokorima ngā kaitākaro ka kōwhiria kia whakamātau takitahi i te kaitieki whainga.
“I whakaritea kia mahia ko tērā hunga i wērā mahi, tērā tokorima tapu, kei a rātau ngā pūkenga, kei a rātau ngā āheinga, kia wikitōria ai mātau ki tērā wāhanga”, te kī a Moko Rangitauira.
Nāwai rā ka toa te kapa o Waiariki, koia te wikitōriatanga tuatoru karapīpiti.
Hei te tau e heke mai nei tū ai te whakataetae ki Te Whanganui-ā-Tara.