Kei te whakakao te kaiwaiata rongonui nei a Rob Ruha i tētahi tira waiata rangatahi i rohe o Horouta waka i Te Tairāwhiti mō tētahi kawenga hou, arā, ko 'Ka Hao' te ingoa. I whai wāhi atu tō mātau karere a Te Kuruotemarama Dewes ki te hurahura i ngā mahi hou a Rob Ruha me wāna tūāpapa tito waiata.

“I roto i aku mahi kapa haka koira taku mahi poipoi i nga rangatahi kia mau ki a ratau nga taonga a nga matua, heoi ano kei roto i aku ringaringa etahi atu kaupapa inaianei mō te waiata tira, tino kaingakau ā tātau rangatahi ki te waiata ngātahi atu i te kapa haka.”

Ko te waiata nei e pā ana ki ngā mahi whakarākai a te Māori me ngā Kanaka Maoli o Hawai'i.

“Kaha nō tērā iwi te mau putiputi ki te taringa heoi anō te Māori ka makaia atu te putiputi ka tīkina atu te rau o tētahi manu hei titi ki runga, nā reira ko wēra tūāhutanga, titiro ki ngā āhuatanga ahureinga a ngāi tātau te iwi Māori, me ā tātau whanaunga o rāwāhi mai, me te kite anō hoki he aha ngā ōritetanga, ana ka whaoina ki rō waiata hei waiatatanga mā tātau mā ā tātau rangatahi.

Tekau mā rua anake ōna tau ka tito a Rob Ruha i tāna waiata tuatahi i Wharekāhika. E mōhiotia whānuitia ana te kātuarehe nei mō tōna ake mita, me ngā tāwara reka o Te Tairāwhiti.

“Mauhamahara wahau i auwa e tamariki ana ki konei ki Wharekahika nei, pai ki auwa ngā rangi e kaha pupuhi ana te hau, ka haere au ki waenganui pārae ka takoto ka whārōrō i waenga pātiti pēnei rā te roa, ka whakarongo ki te hau ka whakarongo ki te pātiti e nekeneke ana ki te tai e haruru ana koinā ngā mea whakakipakipa mai i auawa ki te tito waiata.”

Hei tā Rob Ruha he huarahi e puta ai te whakaaro Māori mā roto i tētahi āhuatanga Māori.

“Tēnā pea he momo hau e pupuhi, mā konā ka puta mai he kōrero ana ko ngā kōrero ngā take o te wā, ko ngā hītoria a ngā mātua tīpuna ngā kōrero tuku iho, koinā ki auwa taku tino kaingākau te tito waiata mō ngā kōrero tuku iho ngā mātua.”

Kei te whakariterite te rōpū nei a Ka Hao i tētahi whakaaturanga i Te Tairāwhiti ā te Oketopa.