Kua riro mā te rōpū kaumātua o Toa Oranga Tinana hei whakahaere i te hui taumāhekeheke mo ngā kaumātua ki Rotorua. Hei tō Laurie Morrison o te rōpū whai muri i te rirohanga ki a rātou te whakahaere i tēnei hui, toru rau neke atu te hunga kaumātua ka tae mai. “Koinei te wā tuatahi kua whakahaere te hui taumāhekeheke mo ngā kaumātua ki konei, kua whakahaere ngā hui kaumātua ā iwi engari anō tēnei mīharo”. I tīmata te kaupapa i ngā tau tekau neke atu. A tēra tau ka eke te kaupapa ki te tekau mā rima tau te pakeke. Hei tō Preston Whare kaiwhakahaere o te whare whakapakari tinana mo ngā kaumātua “miharo tēnei hui kua whai wāhi a Te Arawa ki te whakaatu i o rātou pūkenga”. Ko te tūmanako a Morrison ka whai waahi hoki ētahi atu rōpū ki te kaupapa. “Ma tēnei hui e tāea ai mātou ki te whakawhanaunga ki ngā rōpū e awhina ana i ngā kaumātua me te tuku atu he pānui ki a rātou me te whakaatu i o mātou mahi hoki”. Huhana Davie tētahi o ngā mema o te rōpū kaumātua “he hui tēnei mo ngā kaumātua, mo te tinana, mo te oranga ka nui te hua ki o tātau kaumātua”. E wānanga tonu ana ngā whakaritenga engari ko te matapae ka tū i muri i te marama o Māhuru a tērā tau.
National | Fit club