Kei tawhiti ngā whakaaro o William Warbrick, rua tekau te pakeke nō Ngāti Rangitihi me Ngāti Awa kua whai wāhi ki roto i ngā whakaharatau o te whutupōro Takiwhitu o Aotearoa mo te tau e tū mai nei. Na runga i tōna uruhanga ki te whakataetae Red Bull Ignite 7 ki Tamaki Makaurau i riro ki a ia tētahi o ngā tūranga tokoono. He toa whutupōro mō Te Teko ka huri anga nei ki te tākaro takiwhitu. “I tēnei wā i tērā tau kaore au i te tākaro i te whutupōro takiwhitu i te whakatā kē, engari he tere rawa ngā nekehanga kua huakina ngā huarahi i roto i te rā”. I te rirohanga o tana tūranga ki te kapa whānui takiwhitu o Aotearoa, ka uru ia ki te whakangungu hei te marama o Kohitātea. “I tēnei wā ko taku aronga ki a whakatā taku tinana i tēnei raumati he oma te mahi nui kia tōtika taku tinana mo ngā whakaharatau hei te Kohitātea”. I whai atu tēnei tama o Kawerau i ana hoa kura o mua o Raukura ki te karapu o te Teko, ki reira whakapakari ai. “Kei raru iho ia i te rua mita, kotahi rau mā ono te taumaha, e tāea ia te oma i te wha tekau mita i roto i te rima hēkona ka pai tērā mo te kaitākaro takiwhitu”. I tēnei wiki i hui a William ki te taha o ngā kaiwhakahaere o te tari whutupōro o ngā Rangatira, heoi mo tēnei wā ko tōna aronga kei runga i te whutupōro takiwhitu.
Regional | Auckland