E toru ngā kēmu e toe ana mō Auckland i mua i ngā whiringa whāiti e whakakīkī ai ngā kaiwhiriwhiri Ō Pango e Ioane mō te haerenga ki Ūropi.
Ko Ioane tētahi o ngā kaitākaro hōhō o te kapa o Auckland i te whakataetae Mitre Ten Cup. Kōtahi tonu te hingatanga o taua kapa i tēnei tau, kua whitu ngā wikitōria.
Kua whakamōhio atu ngā kaiako o te Kapa Ō Pango me aha ia e pakari ai tōna tākaro, ā e manako nui ana ia kua tiro pīkari mai ngā kaiako Ō Pango kia a ia. Hei tāna, kua whakapeto ngoi ia kia tutuki pai ngā hiahia o tōna kapa.
Ki te mate kainga tahi, ka ora a kainga rua. Ki te kore a Steve Hansen e pānui i te ingoa o Akira Ioane ki tōna Kapa Ō Pango, ka whai pea ia ki te kapa Ō Pango Māori ka tuki ki a Āmerika, Parīhi, me Hiri. Kāore anō a Ioane kia tae atu ki Hiri, kōtahi noa te wā kua tae tae atu ia ki Parīhi, nā ki te waimarie ia ki te Kapa Māori he pai noa iho tērā, heoi ko te Kapa Ō Pango te aronga nui.
Kua riro kirimana hou a Akira me tōna teina, me Rieko e noho tonu ai rāua ki Aotearoa mō ngā tau e toru. E harikoa ana ia kua tutuki tērā, ka noho tonu ki te kainga me ōna mātua.
Nō tērā tau kōkuhu ai a Ioane ki te kapa Ō Pango i tō rātou tukinga ki te French Fifteen. A, he matenui nōna kia hoki anō ki te kapa, ki tōna teina anō hoki ki a Rieko.
Hei āpōpō tuki ai a Auckland ki a Wellington i Te Whanganui a tara, te kēmu tuatahi o te wiki uaua, e tākaro ai rātou ngā kēmu e toru i roto i ngā rangi tekau.