Kātahi anō ka puta mai te whitia hou a Ria Hall mō tana waiata Te Ahi Kai Pō. Ko Te Pakanga o Te Ranga te horopaki, arā, ko te wawata ia a Hall he whakaohooho i te marea ki ngā pakanga whenua o Aoteroa katoa.
Koia rā tā Ria Hall e mea ana, “Mā ngā mahi pēnei i tēnei whitiata ka huakina ngā tatau ki ngā whare kōrero me kī, ka wānanga tahi ai tātau ahakoa Māori mai ahakoa Pākehā mai, aha atu rānei, mō ngā take ō mua pēnei i ngā riri whenua, ngā pakanga o te motu.”
Ko Te Pakanga o Te Ranga te tūāpapa, ki reira tū ai te puehu, rua wiki whai ake i te Pakanga ki Pukehinahina. Neke atu i te kotahi rau ngā toa Māori i hinga ki Te Ranga.
Hei tā Ria, “Kia kaua tātau e warewarehia i o tātau tīpuna me te ara kua takahia nei e rātau mō tātau o tēnei reanga.”
Nō te tau kua pahemo puta ai te waiata, ināianei he whitiata hou hei whakairo i te ngako, arā hei tā Ria Hall he kura huna, he whakaakoranga anō kei roto mā ngā uri o nāianei.
“Ahakoa tae mai te pouri me ngā wā taumaha me anga whakaroto te titiro ki tō ngākau e kakapa ana, mā reira kite ai koe i te ahi e muramura e kaikai nei i te pō, ko Te Ahi Kai Pō tērā,” te kī a Hall.
Ko Shae Sterling te kaitohu, ā, ka whakaatu te whitiata i a Matiu Hamuera rāua ko Kasina Campbell. Hei te mutunga iho ka kite tātau i a Ria Hall e tū māia ana.
Hei tāna, “Ko tā rāua he whakaatu i te ngau o te maemae mō te rirotanga atu o te whenua me te matenga o te iwi. Kei konei ahau e tū ana i te mutunga hei kanohi mō te iwi Māori, me kī, me te kī ake kei konei mātau ka whawhai tonu mātau mō āke āke.”
Koia ko tā Ria Hall e mea ana, mā te mōhio ka mārama, arā, he timatanga noa tēnei.