Kei te āwangawanga a Nanaia Mahuta i te maha o ngā kai-pōti Māori kua whakawhiti atu ki te rārangi auraki. Kua tae atu rā ki te puku o te wā e whiriwhirihia ai e te Māori te rārangi pōti māna, me te aha, he tata ki te kotahi mano rima rau te hekenga iho i te rāranga pōti Māori.
Ko tā Mona-Pauline Mangakahia o te Te Kaitiaki Take Kōwhiri, “He nui ake ngā tāngata kua nuku mai te rārangi Māori ki te rārangi auraki.
Hei tā Te Minita Take Māori a Nanaia Mahuta, “E ai ki a mātau nei mōhio rua mano tāngata i te marama kotahi kua peke atu ki te rārangi auraki.”
Tūhono atu ana te rārangi Māori ki ngā tūru Māori ki rō paremata. Tokowhitu ngā tūru Māori i tēnei wā tonu, ā, ka piki, ka heke, ka mau tonu rānei, e ai ki te tokomaha o ngā tāngata kei te rārangi Māori kia oti ai te kōwhiringa.
Ko tā Nanaia Mahuta, “Kua rongo mai ētehi o ngā tautauranga e pā ana ki tērā, he āhua āwangawanga mō te hekenga iho me kī, o ngā tautauranga.”
Ko ngā kaipōti ki te rārangi pōti Māori ka tuku pōti ki ngā māngai o ngā rohe pōti Māori. Ko te hunga ki te rārangi auraki, ka tuku pōti ki ngā māngai o te rohe pōti auraki. Ahakoa tēhea rārangi pōti, ka taea te tuku i te pōti pāti ki te rōpū e hiahiatia ana.
Mena ka noho koe ki te rārāngi Māori, ka pōti koe mō tō mema paremata o tō rohe pōti Māori, tokowhitu o aua rohe o Aotearoa.”
Hei tā Nanaia Mahuta, me rapa tautoko rātau te Pāti Reipa i te hunga rangatahi, hei kawe i tēnei kaupapa.
“Mehemea kāre rātau e tino hiahia ki te pōti ki te whakamana i ngā kaupapa tērā pea ka noho ngoikore tātau ehara tērā i te tino wawata a te Pāti Reipa,” te kī a Mahuta.
Ka tū te kōwhiringa Māori ia rima tau. Hei te rua o Ākuhata pau ai te wā ki te kōwhiri.
