Kei te whakanuia te ekenga ōkawa o Wetini Mitai-Ngatai hei Āpiha o Te Kāhui Hiranga o Aotearoa. He tohu e mau nei i te māngai haka, he kai-whakawhanake pakihi hoki, mō wāna mahi nui ki ngā taonga a Tāne-rore.
E kī ana te kōrero; waiho mā te tangata e mihi.
“Ko te whakaatu ki te ao whānui tāua te Māori e tū kaha tonu nei i roto i a Aoteroa, mai anō tērā whakaaro i roto i a au te take i tino whai roa, whai kaha nei au i tēnei huarahi.”
Hei tā te māngai ō mua o te rōpū kapa haka Te Mātārae I Ōrehu, nō tōna tipu iho ki Rotorua ka takahi i tēnei ara.
“He maha tonu o tāua o Te Arawa e mahi tāpoi ana e whakangahau ana, koira hoki te oranga o ngā whānau, he maha tonu ngā whānau ka whakawhirinaki atu ana ki tērā taha.”
Hei tāna he nui ngā kōrero whakahekeheke, nā reira me kaha ngā iwi Māori ki te whakaputa i ngā painga.
“He huarahi pai tēnei mō te ao Māori, te whakatū i a tātau ki runga i te paparewa o te ao, anei rā a Māori e tū kaha nei i roto i ngā mahi kapa haka, pakihi, ahakoa he aha, ā, kia kaha tonu tāua te Māori ki te whakaputa i a tātau.”
Ko tā Wetini Mitai-Ngatai e ngākaunui ana te rangatahi ki mahi kapa haka, ā, mā reira e ora ai te reo me ngā tikanga.
“Ko te ao kapa haka kei reira te oranga kei reira te painga, o te oranga o te reo me te ao Māori me pēnā pea te kōrero.”
Hei tāna, me noho tēnei tohu hei whakamiha ki ōna iwi o Te Arawa Waka me ōna hoa o te ao Kapa Haka.