Kei te kaha haere ngā whakahē ki te kāwanatanga me āna whāinga ki te whakahōu, ki te whakawhānui hoki i te whare herehere o Waikeria, he kotahi pīriona tāra te wāriu. He kotahi mano e toru rau ngā karere kua tukuna ki te Minita Take Ture, ki a Andrew Little me Te Minita Ara Poutama Aotearoa a Kelvin Davis hei tohe i te kaupapa. Ā, kei te tū hoki ngā pihi o Te Kiingitanga me tāna kī ake, he pai ake te whakapau i ngā pūtea ki ngā hōtaka whakaora, whakahono anō hoki i ngā mauhere.
Hei tā te ringatohu o te rōpū Action Station, e whia rau ngā reta nā ngā iwi o te motu e tohutohu ana kia hanga ngā tukanga ture hei whakaiti, hei whakaora, hei whakahōu i ngā mauhere.
“Government supporting more Māori led initiatives for community support,” i mea atu a Laura O’Connell Rapira. “Widening the use of marae-based restorative Justice practices to not just rangatahi and young people but to all people.”
Mā te kotahi pīriona tāra ka rahi ake ngā mauhere mai i tōna ono rau ki te toru mano, te mea rahi ake i te motu ka tū ki te riu o Waikato.
“Koinei ko te āwangawanga o te whakaaro,” i kī atu te Māngai o Te Kiingitanga a Rahui Papa. “E penapena nei i te moni ki runga i te whakahōu i te whare herehere, ā mā wai hei whakakī? Mā te Māori hei whakakī.”
“Mēnā e hiahia ana mātou te whakatū taiapa kia kaua e haere ā tātou nei tāngata ki te whare herehere, me kaha tātou ki te āwhina ā tātou rangatahi ā mātou nei tāngata i taka me kī ki tērā taha o te taiapa, kia haere tōtika,” i kōrero atu te Minita Whakawhanake Māori a Nanaia Mahuta.
Nō tērā tau i tāmoko kirimana ai a Kiingi Tuheitia Pootatau Te Wherowhero VI i tētehi kawenata mahi ngātahi me te Ara Poutama Aotearoa hei whakaheke i te tōai hara, hei whakahoki i ngā mauhere o Te Kiingitanga ki ōna whānau. Ināianei, ka takoha whenua ia i te rohe o Waikato, e toru mīriona tāra ki te hanga whare mō ngā mauhere ka puta i te whareherehere.
"Ko te hiahia, kia penapena ngā moni i runga i ngā hōtaka e puru ai te rere o ngā tāngata ki roto i ngā whare herehere,” i mea atu a Papa. “Matua rā ko te pae oranga o tērā wiki, matua rā ko te kawenata ki te tari Whakatika Tāngata.”
Ko te whakahoki mai a te heamana o te Poari Māori o Ngāti Maniapoto mo tenei take , te tāea e ia te kōrero mō ngā whakahōutanga kotahi pīriona tāra, nā tā rātou ko Ngāti Raukawa kōrero tonu ki te Tari Whakatau i ngā take Tiriti o Waitangi, me te whare herehere o Waikeria.
Hei te paunga o tēnei marama ka haere atu tētehi ope rangatahi Māori ki Te Kāhui Whakakotahi i ngā iwi Taketake o te Ao ki te whakatakato i ngā nawe mō te tokomaha o ngā mauhere Māori ki rō whare herehere.