Kua pari kē Te Tira Hoe Waka o Whanganui, he hekenga mā runga waka e rua wiki te roa e aro ana i te whakatinana i te kōrero, kauaka e kōrero mō tō awa, engari me kōrero ki tō awa.
Ko te whakanui i te mana tūpuna o tēnei awa kua aronuitia i te ao huri noa, engari ehara kē i te mea tauhōu mā ēnei uri o Whanganui kua rua wiki e heke mai ana i te kōputanga, ki te kōpounga o tēnei tūpuna o rātou.
E ai ki a Arapera Tapiata nō Ngā Rauru me Te Ati Haunui-ā-Pāpārangi, "Ehara i te mea he māmā ki te mārama inā kāore i te hono ki te awa te mea kaha mōhio ki ngā āhuatanga o te awa me ērā tūmōmō āhuatanga kia mārama ai ki taua kōrero."
Ko tēnei te Tira Hoe Waka tuatahi a Hinewai Netana-Williams. I āhua mataku ia i te tīmatanga i Taumarunui engari kei te waia haere ia ki tōnā tuakiritanga hei uri o Te Awa Tupua.
Ko tā Netana-Williams, "Kei te āhua mōhio au ki ngā kōrero kaua kōrero mō te awa kōrero ki tō awa, pā atu ki tō awa mā tērā koe ka mōhio koe ki tō awa."
Ko tā Tapiata, "Ki au nei kāore te whakamārama, me whakaatu kē, me karanga mai haere ki runga i to mātou awa mā tērā rātou e marama ai mā tera ratou e aroha ki ta mātou awa ki ta mātou tipua."
E whakarite taura ana te kaumātua nei a Moetātua Turoa hei koha atu ki ngā tauhou o te tira. He tohu ngā taura mō ngā whenu ka whiria ai ngā uri me tā rātou awa.
E ai ki a Tūroa, nō Ngāti Patutokotoko, "He taurahere mai te whenua ki te rangi, he taurawhiri hoki a Hinengākau, mai Hinengakau ki Tamaūpoko ki Tūpoho potiki nei."
Ko tā Gerrard Albert nō Te Awa o Whanganui, "Ka whai anō te tangata i te taura i whiriwhiringia e rātou hei purutanga mā tātou."
Kua tūtuki pai te huringa tau toru tekau o Te Tira Hoe Waka, ā e whakarite kē ana te nuinga ki te hoki mai ā tērā tau.