Kia ora tonu te Mana Māori Motuhake, ahakoa pēhea te otinga hei te rā pōti. Koinei tā te kai-ārahi o te rōpū Mana a Hone Harawira ao ake i te kōrero tautoko kua whakapuakitia e te Pāti Māori kia mahitahi tonu ā muri ake ki te kore ia e uru anō ki rō pāremata.
E mea ana a Hone Harawira, "E tika ana kia kaua e whakaarohia e mutu ana tēnei mea te Mana Māori Motuhake ā te rā pōti, e kao! He hikoi nui, he hikoi roa. Me mihi au ki a Tuku mō tona ake kōrero. Māku anō e kōrero tautoko i tera kia haere tonu te kaupapa mō te Mana Māori Motuhake."
Hei tā te kaiarahi o Mana, ko ngā momo pērā i a Rawiri Paratene, Tame Iti, Dr Lance O'Sullivan me te rōpū House of Shem ētahi o te kotahi rau mano tangata neke atu kei te tautoko te karanga ki runga o Pukamata kia pōti-a-rautaki nei te rohe pōti o Te Tai Tokerau.
Hei tā te tumuaki o te Pāti Māori a Tukoroirangi Morgan i tērā wiki, "He moumou wā te tuku i te pōti mō Kelvin koia te tuarua ki runga anō i te rārangi ingoa. He pai kē atu kia tuku i taua pōti hei tautoko i a Hone."
E mea ana a Hone Harawira ki Te Kāea i tē rā nei, "E rua anake ngā tāngata i roto i Te Taitokerau e kore e tautokotia i te kaupapa. I think ko Kelvin Davis me tona campaign manager a Kaye, ēngari tētahi atu o ngā mea tautoko nei ko te campaign manager o Peeni Henare. Koia tētahi i whakapāho atu i tona tautoko."
E ai ki a Hone, kei runga ake te karanga a te Kingi Māori Tuheitia kia whakatinanahia ai te Mana Māori Motuhake e ēnei tōrangapū.
"Ko te ora kainga rua. He mea nui tērā two for one. Kei kōna kē taku whanaunga a Kelvin, tuku pōti mai mō Hone, ā, e rua ngā mema mō Te Tai Tokerau."
E ai ki a Tukoroirangi, "Ka ngana tonu mātou ki te mahitahi. Me mahitahi i te mea he pūkenga ōna he whakaaro ōna ka mutu ko te ngākau he ngākau Māori."