Ka rongo i ngā kōrero whakatenatena ā ngā māngai kōrero o ngā iwi ki a Whakaata Māori mō āna mahi whakaora tonu i te reo Māori.
Tā Herewini Parata o Ngāti Porou, "Koianei tāku ki a Whakaata Māori e anga whakamua nei, kia warowaro te reo, ngā reo o ā tātou mātua tipuna i roto i ō mātou kainga, i ngā hapori i te ao, ā, kia tahuri tātou katoa ngāi Māori ki runga i a Whakaata Māori, hei aha ērā noa o ngā pouaka whakaata. Whakapoua ō tātou kaha i konei, kia tukuna tō tātou reo me ōnā tikanga kia kōrero, kia pāho ki ngā tōpito o te ao."
Nō tēnei ata ka tuku i ngā karakia tuatahi mō te whare hou o Whakaata Māori e ngā hāhi o Buddha, Baptist, Pai Mārire, Ringatu me ngā Mihingare.
Ko tētahi i haere ko Peeni Henare, mema paremata mō Tāmaki Makaurau, "Ko tō tātou reo ki runga, heoi anō tāku e mihi ana ki a Whakaata Māori ki tērā atu o ngā whakaaturanga, ko te reo Māori tēnā, e mihi atu ana. Ahakoa ngā rare e whiua ana e ngā pāti porotiki ki mua ki te aroaro o te iwi Māori ko te pai o tēnei kaupapa ko te reo Māori ke. Ko te reo Māori ka tū, ko te reo Māori ka ora, ko te reo Māori mō ake tonu atu."
He rua rau rima tekau tāngata i tae atu, ko ētahi he mema pāremata, nō ngā iwi, nō ngā hapori, nō ngā kura me ngā kaitautoko i te kaupapa. A, whai muri atu ana i ngā karakia ka tū te pōwhiri tūturu mō te puaretanga mai o Whakaata Māori.
Tā Te Ururoa Flavell, te Minita Whakawhanaketanga Māori, "Ko te wero ki a tātou, ko te kii mō tō tātou reo kua eke pea ki te wā ki te kii atu ko te hunga kōrero pākeha haere ki tua o te rori. Arā ō koutou hoa haere, te hunga hikareti. E kore au e wareware tērā kōrero i te pai o tērā wero ki a tātou."
Tā Te Waihoroi Shortland, heamana takirua o Te Mātāwai, "Ko te reo te take o tēnei whare, ko tēnei whare te whare o te reo. Kahore i tua atu, kahore i tua mai. Ki te eke tērā whakaaro kua tata tātou ki te waahi e taea ai e tātou te kii kua ūkaipō anō tō tātou reo.