He tata ki te rima tekau tau kua hipa, e whakanui ana a Ngāti Rangiwewehi i te whakahokinga atu o te mana whakahaere i Te Puna o Pekehaua, e mōhiotia ana ko te puna Taniwha ki a rātou.
Inapō rā i whakaae katoa te Kaunihera Roto Moana o Rotorua ki te whakamana i te whakawhitinga atu o te rangatiratanga o te puna ki te iwi.
Nō te tau ono tekau mā ono ka tangohia te mana o ngā puna nei i raro i te ture Hanganga Tūmatanui hei punawai mā te hāpori whānui o Rotorua, kātahi ka tukuna te mana ki te Kaunihera o taua wā.
Kua roa nei a Ngāti Rangiwewehi e auē ana ki te āhua i tangohia hētia ai tō rātou taonga i o rātou ringaringa.
Ā, nō te tau rua mano tekau mā rua i te whakataunga o tā rātou kerēme tiriti, kāre i taea te puna te whakahoki atu, nā runga ngā ture kaunihera o te wā.
Ināianei, nā tētahi whakaaetanga ki waenga i te iwi me te kaunihera, ka noho a Ngāti Rangiwewehi ki te tēpu whiriwhiri.