He whānau e auē, e takariri ana i te tono utu rānaki a te tangata, nāna tā rātou tamāhine i kōhuru. Konei te āhuatanga mō Jimmy Akuhata, e kimi utu ana mōna kua pākia e te wharanga roro whai muri i tāna patunga i roto i te whare herehere o Mautini.
E mea ana te whānau o tana pārurenga, ki te whai utu ia, e tika ana me haere kē aua moni hei painga mā ngā mokopuna kua mahue kore māmā iho.
Kahore e tau tika ana ki te whānau o Ashley Edwards te rongo kei te rapu utu kapeneheihana a Jimmy Akuhata mō tōna tūkinotanga ki roto o Mautini.
E toru tau kua pahure i tenei wiki nō te peinga o Ashley Edwards i tēnei piriti ki roto o Whangarei me te pēhinga a Akuhata i tōna matenga ki raro i te wai kia toromi rā anō ia.
Ki ngā whakamārama a Te Ara Poutama, e tāea ai ēnei momo take te kawe ki te taraipiunara mō ngā kereme motuhake a ngā patunga.
Nā ehara hoki i te mea e whakatikia ana tono a ngā patunga e te rahi o ngā pūtea e puriti ana mō te mauhere, i te nui rānei o te utu kapeneheihana ki a ia.
Ahatia anō tana tautoko i ngā tikanga o ngā mauhere me te hiahia kia āta tirohia ngā āhuatanga katoa i whara kino ai te matenga o Akuhata ki roto o Mautini, e mea ana te karani o āna tamariki, e tika ana mā ngā mokopuna kē ngā painga o tētahi utu kapeneheihana ki tō rāua papa.