I huraina te Kāwanatanga i ngā wāhanga whenua hou puta noa i te motu ka keria pea mō te hau me te hinu.
He kauhau te mahi a te Minita Take Hiko a Simon Bridges ki te minenga o te hui hinu o Aotearoa, ā, ki waho ngā kaiporotēhi e tatari ana.
I ngū te tū, heoi he mana anō tā te ngū.
I pupuri ngā kaiporotēhi a Greenpeace ki ētahi whakaahua mō ngā pā kinotanga a ngā kamupene hinu ki te taiao.
I whakaputa te minita take pūngao a Simon Bridges i ngā pito whenua ka whakamahia i tēnei tau, ko Te Taitokerau, te taha moana o Ōtepoti, Te Whanganui ā Tara me
Taranaki, he rohe kua kaha keria mō te hinu i ngā tau kua hori.
E ai ki a Pieri Munro nō Ngāti Ruanui, “Kia mōhio mai rātou he huarahi anō mā rātou, engari he kai e horahia kei runga i a mātou nei tepu, he tūmomo mahi tēnā, engari āta tirohia kia mōhio mai koutou he aha te whānui, te teitei o tēnei mahi. Kātahi ka whakaarohia he mahi māku, kei a rātou tēnā.”
E ai ki te ture o Aotearoa, kāore kau he here e mea ana me whai wā ngā kamupene hinu o tāwāhi ki te whakapā atu ki ngā iwi, heoi e ai ki te kaiwhakahaere matua o New Zealand Petroleum & Mineral, ki a James Stevenson-Wallace he mahi hiranga nui tēnei ki a ia.
E ono marama e toe ana ki ngā kamupene hinu ki te tuku tono mō ngā wāhi papa moana e toru me ngā wāhi tuawhenua e whā, ā, hei te marama o Hakihea ka puta i a Simon Bridges, ko wai ka hua.