Ko Whakaata Māori tērā i arohaehaetia e te Kōmiti Whiriwhiri Take Māori i te rā nei, ā, tūturu kaore i mimiti te puna kōrero.
Ko te hūnukutanga pea o te teihana tērā, ngā pūtea tautoko kāwanatanga, tae rawa hoki ki te haka tautohenga o Te Iti Kahurangi.
Inatata nei whakanuia te huritau tekau o Whakaata Māori, ā, tūturu he maha ngā kaupapa hei whakamihi.
Heoi, ina ngā aupiki, ara hoki ko ngā auheke, ā, ko ētahi o ērā i arohaehaetia i te rangi nei.
I tae mai ngā ūpoko o Whakaata Māori, ā, ko te ūpoko te whai a Metiria Turei.
Ae marika rarī ana te marea i te kore whai wāhi o te haka o Te Iti Kahurangi ki tētahi whakaaturanga ipurangi a Whakaata Maori, nā wai ra i whakaurua.
Ko te pātai pena he kaupapa here to te teihana mō ēnā tū whakatau?
Kāti, ko te hūnukutanga pea o te kainga o te haka, ara, o Whakaata Māori tonu i patapataitia hoki.
Ko te matapae o te teihana ka ngaro pūtea ia i ngā tau e rua e haere ake nei i te takiwā o te waru rau mano tāra, hei tāna nā ngā mahi whakatū i tana punaha a tihi. Kāti i kona ka haere tonu te hotaka.
Kāti, ko Te Tumu Paeroa hoki tērā i tatū atu ki te aroaro o te Kōmiti Whiriwhiri Take Māori. Ko tāna he whakahaere i ngā whenua Māori kotahi rau mano heketea te rahi.
Kei taua takiwa hoki te tokomaha o ngā kaipupuri i aua whenua rā, ā, e ai ki te toihau ki a Jamie Tuuta ko te whakapā atu ki a rātou tētahi uauatanga nui.
Ko te tono kia whakapakari ake te ara whakawhiti whakamārama me te Kōti Whenua Māori. Kāti, ko te Tumu Paeroa hoki e aro ana ki te whakawhānui i tana punaha a tihi, hei tāna koia tētahi ara e pakari ake ai ana whakawhitinga me ngā kaipupuri whenua.
E ai ki tētahi pūrongo kua heke te āhua reka o ngā kaipupuri ki Te Tume Paeroa mā te whitu ōrau, ki te rima tekau mā rua paehēneti.