He matua, he tipua i ārahi i tōna iwi ki te ara o te tika, ā inā te nui i whai atu. Ko ngā rangatira ā-iwi huri noa i te motu e whakahoki mahara atu ana ki a Tākuta Mahuika, e whakanui ana i a ia mō te nui o ōna mōhiotanga me tōna mana rangatira.
Mai i te Tokerau ki te Tonga mai i te Uru ki te Rāwhiti, he hononga to Api Mahuika ki ngā iwi katoa.
Hei tā Rahui Papa nō Waikato-Tainui, “O tātou rangatira i tīmata pū mai te Kīngitanga i takahurihuri haere i te motu, ka tae ki te aroaro o Te Kani a Takirau, heoi anō ko tāna kōrero kua whakataukītia nei, ehara taku maunga i te maunga nekeneke, he maunga tū tonu ko tōna mana mai ōnamata nō tuawhakarere.”
E ai ki a Pou Temara nō Tūhoe, “I whakatūria ai te whare ki Ruatoki i Owhakatoro, ko Apirana Ngata tonu te īngoa o tērā whare, koira anake pea te whare o Aotearoa nei i whakaīngoatia kia Apirana. Ka titiro ake ki te whare nei ka mahara kia Apirana Ngata, ka mahara hoki ki a Apirana Mahuika, rāua rāua kotahi rāua.”
Ki tā Tame Te Rangi o Ngāti Whātua, “Ae, i roto i ana kōpikopiko ki runga o Tāmaki nei me te rohe whānui anō o Ngāti Whātua, puta atu hoki ki te Taitokerau, ngā wā i tū ai hei pouako, ngā mahi i mahia e ia i muri mai i ērā wā, mō te taha ki ngā tohe, a iwi nei, ki te karauna, ki te kāwana.”
I roto i te Ao mātauranga, i roto i te Ao tōrangapū, mena he hoa, he hoariri rānei, me matāra ki ōna nei pukenga.
E ai ki a Nanaia Mahuta, “He kaha ana ia ki te wero atu ki ngā kāwanatanga katoa, ahakoa te tae o te kāwana, nōna e wero atu mō ngā kaupapa matua e pā ana ki a tātou te iwi Māori.”
Ki tā Tom Roa o Ngāti Maniapoto, “Te koi o te hinengaro. Mārama katoa ki aia ngā mea katoa. Koia te Tiamana o te Rōpu Manukura, mema o te Kaunihera, potaengia ki tana Tohu Kairangi, me te tika o ēra whakamihi i a ia.”
He maramara noa ēnei poroporoaki hei tāpiri atu ki ngā mihi ka utaina ki runga i a ia i roto ngā rā e tū mai nei.
Hei tā Temara, “Ka ngaro atu koe, ka kōrerohia koe, haere ake nei haere ake nei, ka tuhia ngā waiata mōu, ka hakaina koe. Hei konei, kua atua to āhua. Kua kore koe e warewaretia.”
E ai ki a Mahuta, “Karekau he mihi tua atu i te tuku aroha, tuku aroha ki tōna whānau, tuku aroha ki tōna iwi, ki aia anō, me tōna mahi ki waenganui ia mātou, a Waikato, arā ki a tātou te iwi Māori, nō reira moe mai e koro, moe mai.”
Ka karahuihui atu ngā waka, ngā awa me ngā maunga o te motu kia tuohu ki mua i te maunga e kore nei e neke, kia reretahi ngā roimata ki roto i te awa o Te Waiapu.