E toru ngā mētara koura kua whakawhiwhia e Kaiārahi Toa i ngā tau e whā kua hori, nā whai anō ko rātou te kapa makau, ā, kahore e roa ka kitea o rātou pukenga.
I eke panuku te kapa nō Horouta mā ngā waka e rua i mua tonu i a Hinekapuarangi nō Mareikura, he whakatutukinga i harikoa ai rātou.
Pērā i a Kaiārahi Toa, ko te kapa tere rawa mō ngā tāne, ko Pineula Toa i tino eke mai i te huringa tuatahi o te whiringa toa. I kawea tonu tērā mauri toa kia whānui ake te āputa ki mua i a Bhutty Boys me Vaka Manu, kia puritia te mētara koura.
Ahakoa ko Pineula tētahi o ngā tino kapa i te wāhanga pakeke tūwhera, kahore rātou i eke i te reihi kotahi mano rima rau mita te roa engari nā ngā mahi nui i te raumati i whakatutuki ai i tō rātou whāinga.
Ki te whiringa toa wāhine W6 e rima rau mita te roa, i kitea anō te kounga o Kaiārahi Toa, te kapa rangatira o Aotearoa. I kapo ake i tō rātou mētara koura tuarua i tēnei rangi.
Ki te taha o ngā tāne, ko te matapae he tino whakataetae kei te haere ki waenga i a Vaka Manu Black, i a Pineula me OCC engari he tere rawa te toa o tērā tau, i eke panuku anō a Vaka Manu Black mō tā rātou mētara koura e toru karapīpiti.