Ki te Hiku o te Ika, kua whakapuakihia e te hapū o Patuharakeke tana hiahia kia whai wāhi ai te mana whenua i roto i ngā whakahaere o tōna anō rohe, whai muri i ngā tūkinotanga i hua ake ki ēnā huringa i te wā o ngā hararei.
Kei te kārangirangi tonu te hapori katoa i ngā mahi a ngā kaihao pāpaka e mahue ana ngā toenga maunu ki uta, pēnei i ngā pero poaka me ngā tinana heihei.
Ki tā Kiripete Paki, “Ka whakaparu i te moana, ka pīrau haere te poaka, tino pukuriri mātou! Te kōrero mō te mahi a rātou me te aituā o te tangata hainamana ki Uretiti, ka aroha."
I raro i ngā whakahaere o te Kaunihera ā-rohe, Te Papa Atawhai, Te Manatū Ahu Matua me te karapu whakaora o Ruakākā i tēnei wā, i riro tonu mā te hapori anō tō rātou one e whakapai. Ka mutu, e rua hoki ngā tāngata kua toromi ki Uretiti i muri i te Kirihimete.
Hei tā Paki, "E kuare ana rātou ne, ka aroha. Ko te mahi nui ka whakamōhio rātou te tikanga o te ao Māori mō te whenua, te moana me te kohikohi i ngā kaimoana."
Kua taka noa te tono a Patuharakeke māna ngā maitaitai o tōna rohe e tiaki engari kei te wawata tonu kia whakatīnanahia ngā ōati o te Tiriti mā rātou anō o rātou na taonga e whakahaere.
E ai ki a Paki, "Te mahi a Patuharakeke, ko te kaupapa o te kaitiaki i tuku iho i ngā mātua tūpuna kia tiaki i te whenua, tiaki i te moana me te takutai moana."
Hui ai te hapori me ngā mana kāwana ki te rapu i te ara whakatika.