Kei te whakarite tētahi wahine nō Rotorua ki te kauhoe i te tekau mā tahi ira rima kiromita mai i Motiti ki Maketu, he whāinga hei kohi pūtea mō Hospice.
Hēoi ehara ko te pūtea anake te take, engari mō ia roanga o te kau ka tuku mahara ia ki tōna māmā i riro ki te mate pukupuku.
E ruku atu ana a Mariana Morrison ki ana whakangungu, i runga anō i te hiahia ka aro mai te tangata ki tana kaupapa.
Horekau rawa a ia i te tangata noho noa. I tērā tau ka tūtuki i tana omanga roa, he kotahi rau kiromita te tawhiti.
I tēnei tau, ko tā tēnei uri o Te Arawa, Ngāi Tai me Te Whakatōhea, kua whakaritea ko Te Moana nui ā Toi mai i Motiti ki Maketu hei terenga kauhoe māna, ā, he tekau mā tahi ira rima kiromita te roa.
Kua whakaritea e ia ko te rangi o Valentines, arā te tekau mā whā o Pepuere mō tana kauhoe nui, ā, ehara hoki i te kohikohi pūtea noa iho te whāinga māna.
