E mea ana ngā rangatira o te kaipuke Rena, he uraura, he koura rangi engari e whakapae ana te hau kāinga o Motiti, he terenga hinu kē.
E tū ana ngā pihi o Ngāi Te Hapū, he hapū ki Motiti, e pā ana ki tētahi totohe hōu ki te hunga nō rātou te kaipuke Rena.
He tauira anō tēnei e ai ki ā rātou, e whakatūturu ana i te tohe kia hikitia atu te Rena, ko tōna katoa.
He whenua taurikura nei ki te Moana a Toi, e pēhia ana e te mate.
E ai ki a Rangi Butler kua noho manakore te haukāinga, nā te kaipuke Rena te take. E kore e taea e ia te whangai kaimoana ki āna manuhiri, he tikanga kua mahia mai ra ano. Ko tāna ano kei reira tonu ngā raruraru.
Kīhai a Te Kāea i tae ki te tātahi e whakapāetia ana i kitea ai te hinu, engari ko tā ngā kainoho kei te kite tonu te hinu ki runga i ngā toka i reira. E ai ki ā ratou kua noho reo kore ratou me o ratou amuamu.
E ai ki a Buddy Mikaere, māngai mo Ngāi Te Hapū, he mahi uaua kei mua i te aroaro.
E matapaetia ana hei te tau e tū mai nei ka āta wetewetehia e te Kaunihera ā-rohe o Te Moana a Toi te tono kia waihotia te Rena Ki Otāiti, heoi ko te tūmanako a te hau kainga ka pari te tai ki a rātou.
