Kua parea ngā raruraru a-whare o te tāone o Maraenui ki Ahuriri, i tāmokohia tētahi kirimana ki waenganui i te Whare Kaporeihana, te kaunihera me ētahi atu anō rōpū hapori kia tāea ai e rātou te whakatū whare pai ki reira, me te oranga nui o te hapori katoa.
Kua hainatia, kua mana. Tata ki te tekau ngā rōpū i tāmoko i tētahi kirimana, katoa o aua rōpū e mahi ana ki te whakaora i te tāone o Maraenui.
E ai ki a Andrew Cairns, “Kua roa nei mātou e mahi ki te whakatutuki i tēnei kaupapa, nā reira, he rangitāmirotanga o ngā uepu katoa e mahia ai te mahi.”
Ka matapaki ngā rōpū katoa, me pehea rātou te hanga mahere matua, hei whakatū whare pai, hei whakawhanake i te tāone o Maraenui. Ko te tuatahi me titiro atu ki ngā mea hei hāpai, hei whakaawe i ngā āhuatanga katoa o te hapori.
Hei tā Maureen Mua o te Rōpu a Iwi Trust, “Me whakawhitiwhiti kōrero ki te hapori, kia mōhio ai rātou he aha te aha, koira tētahi o ngā raru nui, kāore ngā kōrero i rere. Ināianei, kei a mātou he kōrero hei kawe atu ki a rātou.”
I tīmata ai te kaupapa whakaora a Maraenui i ngā tau e toru ki muri. Mai i te wā i mea atu te Whare Kaporeihana ka nekehia ngā kairēti e rātou ki wāhi kē, kia turaki i ngā whare kāore i te pai, kāore hoki i te tū māro i te wā o te rū whenua. Otira, kua mahue mai ngā whare mokemoke, ngā whare hakurara.
Ka mahi ngātahi ia rōpū kia kite ai he aha ngā mea pai mō te tāone, ara ngā whare utu iti, pērā i te social housing, me pehea te whakapiki ake te ōhanga, ngā tāngata te whai mahi, whakawhanake pūkenga anō hoki.