He rā hei whakanui i ngā momo iwi taketake o te Kura Tuatahi o Homai, i Manurewa.
Koia nei te kaupapa o tā rātou hui nui i tēnei wiki, hei whakakotahi anō i a rātou i runga i te aronga whakamua, ki te huritau ono tekau o te kura nei, ka tū hei te tau rua mano, tekau mā rima.
Nā te tangi o te pūtātara i timata ai te pōwhiri kia whakaekehia te ātea o te Kura Tuatahi o Homai, me te aha nā ngā tamariki mokopuna tonu i arataki te kaupapa o te rā.
E ai ki tētahi mema poari o te Kura Tuatahi o Homai, a Timi Tairi, “Ka tū mai ngā rōpu kapa, tae noa ki ngā rōpu whanaunga Moutere e tū mai ki o rātou nei tikanga, he whāngai ngā kai tikanga kei muri o mātou nei kura, tae noa ki te whakanui o mātou nei taonga a Huatau, a Tamapahore, me Tamapahure.”
I whakakao mai ngā mātua me ngā hoa, ki te mātakitaki i ngā mahi kua oti i ngā tauira i tenei tau, ā miharo ana te kitea o te ngākaunui o tenei kura ki te hāpai i ngā tikanga a tēnā iwi, a tēnā iwi.
Hei tā Timi Tairi, “Ko te nui o mātou nei moemoeā kia hoetahi ai tātou i roto i tō mātou nei waka ki te ako i ngā tikanga Māori, ngā tikanga whanaunga Moutere, ngā tikanga o tēnei ao o te pākeha, hei oranga tērā mō te whāngai o mātou nei tamariki i roto i te mahi mātauranga o te kura nei.”
Otirā, kāre e kore he maha ngā piki me ngā heke kua kitea e ngā pakitara o tēnei kura, engari, ia rātou e ahu atu nei ki te huritau ono tekau o te kura, mā te whakakotahi mai i raro i te whakawhanaungatanga, ka tutuki pai ngā mahi whakanui a tērā tau.
Ki tā Timi Tairi, “Ahakoa ngā piki me ngā heke i roto i ngā tau kua pahure ake nei, ko te tino mea nui ko te whakawhanaungatanga ana mātou ki ngā kaiako ki ngā tamariki, tamariki ki te kaiako, tae noa ki te hapori anō.”