Kua puta te whakatau a ngā rangatira o Rena, ka kore rātou e hari i tā rātou tono ki te Kōti Taiao e mau ai te kaipuke Rena ki Te Toka o Otaiti.
E mea ana ngā kōmihana whai mana o Te Kaunihera a Rohe o Toi Moana, ka whakarongo rātou ki a rātou tono hei te tau titoki.
I pupū ake te kaupapa nei nā te whakaaetanga o te Taraipiunara o Waitangi i roto i tā rātou rīpoata i te rangi nei e mea ana, kāre te karauna i whai i ngā hiahia a te mana whenua me ngā uri e whai pānga ana ki Te Toka o Otaiti.
E mea ana te Taraipiunara o Waitangi i whati te hononga a te Karauna me ngā rangatira o te kaipuke Rena i ngā whakawhitiwhiti kōrero me te mana whenua mō tētahi whakaputanga.
E hiahia ana ngā rangatira o te kaipuke - kia whakaae rawatia te Karauna, e mau ai te kaipuke ki Te Toka o Otaiti, a, ka waiho ake mā ngā māngai mana whenua e rua ō Motiti e whakapae ki te Taraipiunara o Waitangi.
I te rā nei i puta te rīpoata whakamutunga a te taraipiunara me tā rātou, "I hē ngā mahi a te Karauna ki te whai i te tika, me te kore aro hoki a te Karauna ki te whakamōhio atu ki te mana whenua i mua i te waitohutanga o te Wreck Removal Deed."
Kāti ake, i tika ngā kereme a Motiti Rohe Moana Trust rātou ko Ngāi Te Hapu me te kaunihera ā rohe Māori o Mataatua mō tēnei take.
Hei tā Awanuiarangi Black, “Ko te nuinga e kīa ana me tango i taua kaipuke i te wāhi rā mai rāno e pēnei ana te kōrero a kei te pēnei tonu te kōrero me taku mōhio mō te nuinga o ngā tāngata Māori mai pākeha mai kei te tautoko mai i tēnei o ngā whakaaro.”
Inaianei kua whakaae ngā rangatira o Rena, ka kore rātou e kawe i tā rātou tono ki te Kōti Taiao e mau ai te kaipuke ki Te Toka o Otaiti.
Ka waiho ake mā ngā kōmihana whai mana o Toi Moana e whakahaere i ngā tono, ā, e whakaaro nui ana te mana whenua mo te huarahi e whai nei e ngā rangatira o Rena.
Ko te āki a te Taraipiunara me kaha ake te Karauna ki te whakatewhatewha i ngā hiahia a te Māori i roto i ngā tukanga whakaae o te Taiao, e kōkiri hoki te mahi ngātahi o ngā iwi whai pānga.
