I kohia katoatia e te Ihorei o Ngāpuhi, e Hone Sadler, ngā kōrero hītori, ngā whakapapa me ngā karakia o ōna hapū ake, ka tāngia ki tana pukapuka hōu, kaua mā āna uri anake, engari mā te motu me te ao.
He mātanga kaiako i tētahi o ngā whare wānanga mana nui o te motu, e nōhia ia ki te taumata o Tūhoronuku e whakatauria ana te kereme o te iwi nunui rawa o te motu, heoi ko Ngāpuhi iwi anō rā te pūtake o tōna pukapuka whakapuaki tuatahi, Ko Tautoko te Pito o Tōku Ao.
Kua roa nei a Hōne e tuku ana i ngā kōrero anamata, ā-waha nei, ki ngā kete matauranga a ētahi atu, mai i ngā taiwhanga ako, tae atu ki ngā nohoanga a te Taraipiunara o Waitangi, hei tāna kua tae ki te wā kia tāngia ngā kōrero nei.
Hāunga te pakeketanga o tēnei tōtara haemata o Ngāpuhi iwi, he tīmatanga noa iho te pukapuka nei i tetahi ao anō e rukuhia ana e Hōne a mohoa.
"E koa ana taku ngākau kua mutu tēnei pukapuka heoi kāore anō kia oti. He nui tonu ngā kōrero."
Ko aua mahi e kōrerotia nei e ia, he pukapuka anō, he kōrero anō heoi ka whakawhāitihia ki ētahi o ngā tino i para i te huarahi whakamua mō Ngāpuhi nui tonu.