He kaiako ō-mua ka tātaki ake i te rohe pōti o te Tai Tokerau ao ake i tāna whakahinga i a Hone Harawira.
Ehara a Kelvin Davis i te tauhou ki nga mahi tōrangapū, engari nā āna hinganga e rua ki a Harawira i ngā tau, i rihaina ia i te ao tōrangapū i te tau rua mano tekau mā tahi.
Kātahi ia, ka whai niho anō ki rō pāremata, i te wehenga atu o Shane Jones.
Hei tā Davis, "Me whakaaro ake te pāti mō te tautoko a Ngāi Māori i a mātou, ā, ki te kore taua tautoko i toko ake, kua kawa rawa te kitenga mō te pāti.
Heoi, kua tautoko mai te whānau i a mātou ngā mema pāremata Māori i roto i ngā rohe pōti Māori, ināianei me tutuki ngā mahi."
Tērā tonu te pātai mehemea ka ora tonu ngā kaupapa mō te pani me te rawakore i roto i ngā whāinga matua a te kainoho hōu i te tūru o Te Tai Tokerau.
Ko tāna anō, "I kauhau ahau i aku kaupapa matua o te mātauranga mō te hapori whānui, pēhea hoki te awhi i te pani me te rawakore, te reo Māori, te whakakore i te mahi tūkino ā-whānau, te mahi pāwhera, puta noa i Aotearoa, me ngā take hoki nā Hone anō i whakahua, kei te whai hoki ahau, heoi kua rerekē taku whai i te mea he tangata rerekē ahau."
Ko te hua o te kōwhiringa pōti kei te tohu mai, e toru anō ngā tau mā Reipa ki te taha āpitihana o te whare.
Hei te Tūrei o tēnei wiki hui ai te rōpū Maori o Reipa, ā, e kore hoki e kore ko te kaiārahitanga o Reipa tētahi o ngā take huhua hei wānangatanga mā rātou.