I te Taitokerau, neke atu i te haurua katoa o ngā penehīni me te nuinga o ngā tihara o tēnei motu kei te puta i te kamupene hinu o Aotearoa ki Poupouwhenua ara Marsden Point.
Engari kei te awangawanga te iwi o Patu Harakeke ki tētahi tono hou kia keri ake te wahapū o Whangarei e hou mai ai ngā wakahari hinu nui rawa.
He tono hou kua ara ki te pae kia keri anō i tēnei wahapū i te mea he papaku rawa te moana kia hou mai ngā waka hari e kī ana i te hinu.
Hei tā Sjoerd Post, te Tumu Whakarae a Refining NZ, “Ko te hiahia kia whakawātea te ara mā ngā kaipuke, ā, e hiahia ana i runga i te āhua tika me ngā hapū, inā he mīharo te whakaaro e here nei i te ao tawhito ki ngā anamata, me te tiaki i ngā mea kua tukua iho e ngā tīpuna.”
Koina pū te aronga o Patu Harakeke me ēra atu o ngā hapu o Whangarei Terenga Paraoa.
E tū ana tēnei kamupene hinu i runga te whenua i murua e te karauna. E rima rau ōna kaimahi i tēnei wā, ā, ina oti tēnei tono, ka kake mai i te ono rau mano kaho ki te kotahi miriona kaho kei te puta ia tau.
Ka mutu, e mea ana a Patu Harakeke katahi anō ka pēnei rawa te mahinga tahi o tētahi kamupene kia rātou mo ngā nekehanga i to rātou anō kainga.
E mea ana te uri o Patu Harakeke, a Juliane Chetham, “E whai nohonga ana mātou ki te tēpu whiriwhiri, nāreira e hari ana mātou ki te āhua kua kawea ai tēnei kaupapa, ā, ka noho pea ā mātou mahi hei tauira ki ērā e whiriwhiri tahi ana mō nga kaupapa taiao.”
E ai ki a Sjoerd Post, “He aha te oranga kei tua mō te wahapū nei, ā-mahi, ā-taiao, ā-hapori hoki. Ā ka pehea whakaritea ai tēnei kaupapa kia tika ai.”
Taihoa ake nei tēna pea e hua ai he tino tauira mō te mahi ngātahi me te tangata whenua.