He pārekereke whutupōro a Te Whanganui-a-Tara i matoko mai ai ētahi o ngā toki poutoko o te motu pēnei i a Piri Weepu rāua ko TJ Perenara, me te aha, tērā ētahi toki hōu kei te ara ake.
Ko Frae Wilson ka tū mō te kapa Raiona i tēnei wiki ki te tukinga ITM ki a Northland, heoi ehara i te mea kua toka tōna tūranga, i te mea tērā tētahi katuarehe nō Ngāti Porou kei ōna rekereke e aruaru ana.
Ahakoa te tawhiti o te pae, kua tutuki tonu te aruaru a Sheridan Rangihuna.
Kua whakaingoatia te māhuri tōtara nei, he rua tekau tau tōna pakeke, ki te pae hihiri mo te kapa Wellington Lions, i muri i te poutoko mo ngā Highlanders, a Frae Wilson.
Kua tau mai a Wilson ki tōna tūrangawaewae whai muri i te wharangā o tōna turi i te marama o Pipiri, ā kua rite ia ki te whakakī i ngā hū o TJ Perenara, i a ia e tākaro ana mō te Kapa Opango.
I tērā wiki i hinga te kapa o Waikato i a rātou i te tukingā tuatahi o te tau nei, ā kua ihuoneone i tēnei wiki mō te kapa Taniwha kei te pae.
Hei te haurua i te rua karaka i te ahiahi o te Rāhoroi tuki ai te kapa Lions ki te kapa Taniwha ki Toll Stadium i Whangarei.