He ākonga tau tekau mā toru a Tekiteora Rolleston-Gabel o Ngā Taiātea Wharekura kua tohua hei māngai mō tōna kura me Aotearoa whānui ki te hui pūtaiao mō ngā whenua o Āhia ki Singapore.
Koia tētahi o ngā tauira tokorima kua tohua, ā, koia anake te Māori kei te tira haere.
Ko te pūtaiao te tino marau a Tekiteora Rolleston-Gabels ki te kura, ā, kua whai wāhi tēnei tauira o Ngā Taiātea Wharekura ki te haere ki Singapore mō tētahi huinga pūtaiao.
Hei tā te tumuaki o Ngā Taiātea Wharekura, a Watson Ohia,“He ākonga, he kōhine whakahirahira tēnei, puku mahi, arotahi ana ki āna mahi, ka kaha kē ia ki te whakahaere i a ia anō, tōna whānau hoki, he whānau tautoko, whānau manaaki.”
E ai ki a Te Kiteora Rolleston-Gabel, “Ko tāku, he haere hei kanohi mō Taiātea me tōku whānau, otirā mō Aotearoa.”
Nā Ngā Pae o te Māramatanga i tohu i a ia ki te haere i runga i te kore utu.
E ai ki Tekiteora, “He tino waimarie au ki te whai wāhi atu ki te haere ki reira, whai akoranga ahau, tūtaki atu ki ngā kaipūtaiao, ngā tino tohunga.”
Hei tā Watson Ohia, he kura tēnei e whakatipu ana i ngā rangatira Māori pēnei i a Tekiteora. “Ka tāea e te Māori, kōrero Māori, tipu ake ki roto i te kaupapa Māori te whai i tēnei tūāhuatanga, ngā taumata tiketike i roto i te pūtaiao.”
Mō tēnei tauira nō Taiātea Wharekura he tuatahitanga tēnei mōna te whakawhiti atu ki ngā whenua o Āhia, ka rere atu ia hei tēnei Rāmere.