Kei koni atu i te rua rau ngā tāngata i whakakikī i te whare tapere o Te Ahu i Kaitaia inapō, mō te hui tuatahi a te rōpū Ipurangi Mana, nōna e takahi nei i te nuku o te whenua ki te kauhau i ana rongo, ā, i reira hoki tā mātou karere tōrangapū, a Maiki Sherman.
Na te haukainga te wero tuatahi i whakatoko ki nga kaitorangapu, i te tini o Kaitaia i karapinepine nei ki te whakarongo ki nga kauhau a te paati hou o ta ratou mema paremata, o Ipurangi Mana.
Ko te kapo i nga kaipooti rangatahi tetahi aro nui mo Ipurangi Mana.
Tuturu he tokomaha nga kanohi taiohi i tae ake ki te hui, heoi, na wai ra ka kite ko te wero he pupuri marika i taua aro.
Tekau ma rima tau te pakeke o Te Amohaere Rudolph, no reira hei tera kowhiringa poti ra ano ia ahei ai ki te tuku pooti.
Marakerake te kitea ka whai hua te tohutanga o te mangai taiohi o Mana, o Wairangi Koopu - e whakararata nei i te marea.
E mea ana a Koopu, “Kia rehitatia, kia pooti, ah koira tetahi mea nui ki a tatou katoa kia rongo ai te reo o te hunga rangatahi.”
Kaati e whakapaetia ana e rima orau o te hapori o Kaitaia i puta ake ki tenei o nga hui, me te wawata o Ipurangi Mana ka pera hoki ta ratou puta ake ki te tuku pooti hei te kowhiringa a motu.