Ko tā te pūrongo mō te Kaiwhakahaere Matua o te tari Māori, Iwi Moananui-a-Kiwa o Te Reo Tātaki a Shane Taurima e mea ana, i hē tāna whakamahi rauemi mō āna mahi tōrangapū i te Rōpū Reipa te painga, heoi kāore tonu ia i whakatītaha kōrero i roto i āna kawenga pūrongo.
I heke a Taurima i tōna tūranga i te Reo Tātaki i te wā i huraina e Whakaata Toru ngā kōrero mō tōna whai wāhitanga atu ki tētahi hui rautaki, kohi pūtea hoki a te rōpū Reipa i tū ki ngā tari a Te Reo Tātaki, i pau anō ai ētahi o āna rauemi.
I wero anō te komiti arotake i te whakapau a Taurima i ngā pūtea a Te Reo Tātaki hei hari mai i a Heni Tāwhiwhirangi i Tūranga ki Tāmaki.
Hei tā Taurima i te hui rāua ko Tāwhiwhirangi mō tētahi kaupapa pakihi, heoi e ai ki te poari he āhuatanga hihira kē tēnei, inā i tāna taunga mai i tae atu a Tāwhiwhirangi ki tētahi hui a te rōpū Reipa i tū ki te whare o Taurima.
Kāore te komiti i whakawhirinaki atu ki ngā whakamārama a Taurima, ā, kua tono kia whakahokia atu e te kaiwhakahaere o mua te toru rau toru tekau tāra i pau i a ia ki tēnā take.
Ko tā te komiti arotake, tōna tikanga me āta whakamārama a Taurima te hohonutanga i ōna here ki te rōpū Reipa.
I titiro anō te komiti ki te whai wāhitanga atu o ētahi kaimahi tokotoru kē atu o te tari Māori, Iwi Moananui-a-Kiwa i te wā i a Taurima.
Ko tā te pūrongo anō, nā rātou i noho taupatupatu ai ō rātou kawenga ā-mahi, ā-tōrangapū hoki, ā, taka rawa mai, kāore rātou i te mahi ki te pou whakaata rā.
Kua tuku a Taurima i tōna ingoa hei kaitono mā te Rōpū Reipa ki Tāmaki Makaurau, ā, ko Wiremu Flavell tōna hoa whakataetae. I te putanga o te pūrongo, kāore te kaiārahi o te rōpū mō te whakakore atu i tōna tono.
Kaore ano a Reipa kia whakatau a hea rātou tohu ai i to rātou tangata mō Tamaki Makaurau. A ko Te patai ia, ma Wai a Shane e Taurima?