He āhuatanga tēnei i whakakotahi i te katoa o ngā ringa raupā o tēnei kiriata mō te wā tuatahi i te kotahi tau.
Mō tētahi o ngā kaihanga o te kiriata nei, a Te Arepa Kahi, i te hikaka katoa tōna wairua nā te mea i tēnei wā kua tutuki tētahi o tōna tino wawata, ko te whakatīnana o tēnei kaupapa whakahirahira mōna.
Nonāpō rā i kite tuatahi ai ngā kaimahi rātou ko ētahi o te iwi o Pukekohe i te kiriata, mō te nuinga koinei hoki te wā tuatahi i reira ai te whakatau nui ki ō rātou mata.
Ko 'Hone' i whakaarihia e Troy Kingi, mōna ake koinei tōna kiriata tuatahi. Ko tāna kīhai tērā he hiahia nōna te tū hei kaiwhakaari, engari ko te kī a ngā kaihanga kia tū pono i a ki tōna āhua, koira hoki tāna mahi.
I reira a Te Kāea i te wiki tuatahi o tēnei kiriata, ā, kua kaha mātou te whai i tēnei kaupapa nō taua wā. Hei tā te ringatohu a Te Arepa Kahi nā te angitu o tēnei kaupapa mei kore he kiriata anō ka whaia e ia . Ko tāna anō kua whakaae te New Zealand Film Commission ki te tuku pūtea āwhina mō tētahi atu kiriata kei te whakaritea e ia.
Kāre e kore, ko te tuatahi noa iho tēnei o ngā pāinga o te mahi kiriata ka rangona e ngā kaitāpere nei, tō rātou kiriata a Mt Zion ka whakaatu tuatahi hei te rā o Waitangi.
Kairīpoata: Rahia Timutimu